കൊച്ചി: ചൈനയില്‍ പൊട്ടിപ്പുറപ്പെട്ട കൊറോണ വൈറസ് ഭീതിവിതച്ചു മുന്നേറുമ്പോള്‍ കേരളത്തിലെ വ്യാപാര രംഗവും ഭയപ്പാടില്‍. സംസ്ഥാന ആരോഗ്യവകുപ്പ് അതീവ ജാഗ്രത പ്രഖ്യാപിച്ചതിനു പിന്നാലെയാണ് വ്യാപാര-വാണിജ്യ രംഗത്തും ആശങ്ക ഉയരുന്നത്.
കേരളത്തില്‍ നിന്ന് ചൈനയിലേക്ക് കയറ്റുമതി നടത്തുന്നവര്‍, ചൈനയില്‍ നിന്ന് കളിപ്പാട്ടങ്ങളടക്കം ഇറക്കുമതി ചെയ്ത് കച്ചവടം നടത്തുന്നവര്‍, വിനോദസഞ്ചാര രംഗത്തു പ്രവര്‍ത്തിക്കുന്നവര്‍ തുടങ്ങിയവരെല്ലാം ആശങ്കയിലാണ്.
കേരളത്തില്‍ നിന്ന് ഞണ്ടും വിവിധയിനം മത്സ്യങ്ങളും ചൈനയിലേക്ക് കയറ്റുമതി ചെയ്യുന്നുണ്ട്. പ്രതിദിനം 2,000 കിലോ ഞണ്ടുവരെ സംസ്ഥാനത്തു നിന്ന് ചൈനയിലേക്ക് കയറ്റിയയച്ചിരുന്നു. കൊച്ചി, കൊല്ലം, കണ്ണൂര്‍ തുടങ്ങിയ ജില്ലകളില്‍ നിന്നുള്ള മത്സ്യ കര്‍ഷകരാണ് എറണാകുളത്തെ ഏജന്‍സികള്‍ വഴി ഞണ്ട് കയറ്റിയയച്ചിരുന്നത്. ജീവനുള്ള ഞണ്ടുകളെ പ്രത്യേക കാര്‍ട്ടണുകളിലാക്കിയാണ് കയറ്റുമതി ചെയ്തിരുന്നത്.
എന്നാല്‍ കൊറോണ ബാധയെ തുടര്‍ന്ന് ചൈനയിലേക്കുള്ള കയറ്റുമതി നിര്‍ത്തിവച്ചിരിക്കുകയാണ്. ഞണ്ടുകളെ പിടിച്ച് കാര്‍ട്ടണുകളിലാക്കിയാല്‍ പരമാവധി ഏഴു ദിവസംവരെയാണ് ജീവനോടെയിരിക്കുക. കയറ്റുമതി നിര്‍ത്തിയതോടെ കേരളത്തില്‍ ഞണ്ടുവില ഇടിയുകയുമുണ്ടായി. നേരത്തെ കിലോഗ്രാമിന് 1,250 രൂപ വരെ ഉയര്‍ന്നിരുന്ന ഞണ്ട് വില ഇപ്പോള്‍ പകുതിയില്‍ താഴെയായി കുറഞ്ഞെന്ന് വ്യാപാരികള്‍ പറയുന്നു. നിരവധി മലയാളികളാണ് ചൈനയില്‍ നേരിട്ടുപോയി ഇലക്ട്രോണിക്‌സ് ഇനങ്ങള്‍, കളിപ്പാട്ടങ്ങള്‍ തുടങ്ങിയവ എത്തിച്ച് കേരളത്തില്‍ വ്യപാരം നടത്തിയിരുന്നത്. എറണാകുളത്തു നിന്നു തന്നെ പലരും ചൈനയില്‍പോയി സാധനങ്ങള്‍ മൊത്തമായി എടുത്തുകൊണ്ടുവന്ന് ചെറുകിട കച്ചവടക്കാര്‍ക്കു വിതരണം ചെയ്തിരുന്നു.
കൊറോണ പൊട്ടിപ്പുറപ്പെടുന്നതിനു മുമ്പ് ഓര്‍ഡര്‍ ചെയ്ത കളിപ്പാട്ടങ്ങളും മറ്റും വിവിധ തുറമുഖങ്ങളില്‍ കെട്ടിക്കിടക്കുകയാണ്.
പുതിയ സാഹചര്യത്തില്‍ ഇത്തരം സാധനങ്ങള്‍ ഇനി ഇന്ത്യയിലേക്ക് പ്രവേശിപ്പിക്കാനുള്ള സാധ്യത വിരളവുമാണ്.
മുന്‍കൂര്‍ പണമടച്ച് സാധനങ്ങള്‍ ഓര്‍ഡര്‍ ചെയ്ത വ്യാപാരികള്‍ പണം നഷ്ടപ്പെടുമോ എന്ന ആശങ്കയിലുമാണ്.ഇതിനു പുറമെ, ടൂറിസം രംഗത്ത് പ്രവര്‍ത്തിക്കുന്ന സംരംഭകരും ആശങ്കയിലാണ്. കൊറോണ ബാധയെ തുടര്‍ന്ന് വിവിധ രാജ്യങ്ങള്‍ വിനോദ സഞ്ചാരത്തിന് നിയന്ത്രണമേര്‍പ്പെടുത്തിയിട്ടുണ്ട്. ഇതു വിദേശ സഞ്ചാരികളുടെ ഒഴുക്കിനെ ബാധിക്കും.
കേരളത്തിലെ വിവിധ വിനോദ സഞ്ചാര കേന്ദ്രങ്ങളിലേക്ക് ചൈനയില്‍നിന്ന് കൂടാതെ സമീപ രാജ്യങ്ങളായ സിങ്കപ്പൂര്‍, ജപ്പാന്‍, ദക്ഷിണ കൊറിയ, തായ്‌ലന്റ്, തയ്‌വാന്‍, വിയറ്റ്‌നാം,നേപ്പാള്‍ തുടങ്ങിയ സ്ഥലങ്ങളില്‍ നിന്നും വിനോദ സഞ്ചാരികള്‍ എത്തിയിരുന്നു.
നവംബറില്‍ ആരംഭിച്ച വിനോദ സഞ്ചാര സീസണ്‍ ഇപ്പോഴും തുടരുകയാണ്. അതിനിടെയുള്ള കൊറോണ ഭീതി തിരിച്ചടിയായിട്ടുണ്ട്. നേരത്തെ ബുക്ക് ചെയ്തിരുന്ന പലരും യാത്ര മാറ്റിവയ്ക്കുന്നതായി ടൂറിസം സംരംഭകരും പറയുന്നു.