പരപ്പനങ്ങാടി: ചെമ്മാട് റോഡില്‍ പരപ്പനങ്ങാടി പൊലിസ് സ്റ്റേഷന്‍ പരിസരത്ത് റോഡിന്റെ ഇരു ഭാഗത്തും മണല്‍ കേസുകളിലടക്കം പിടിക്കപ്പെട്ട വാഹനങ്ങള്‍ നിര്‍ത്തിയിട്ടിരിക്കുന്നത് വാഹനങ്ങള്‍ക്കും യാത്രക്കാര്‍ക്കും ദുരിതമാകുന്നു.
ഏറെ തിക്കും തിരക്കുമുള്ള റോഡരികില്‍ വലിയ വാഹനങ്ങളടക്കമുള്ളവ ദിവസവും കൂടിക്കൊണ്ടിരിക്കുകയാണ്. പരപ്പനങ്ങാടി കോടതി, രജിസ്ട്രാര്‍ ഓഫിസ് മറ്റു സര്‍ക്കാര്‍ കാര്യാലയങ്ങളിലേക്കെത്തുന്നവരും വിദ്യാര്‍ഥികളടക്കമുള്ള യാത്രക്കാരും വളരെ പ്രയാസപ്പെട്ടാണ് ഇത് വഴി നടന്നു പോകുന്നത്.
റെയില്‍വേ മേല്‍പ്പാലത്തിനടുത്തും ടോള്‍ ബൂത്തിന് സമീപവും നിരവധി തൊണ്ടി വാഹനങ്ങള്‍ നിര്‍ത്തിയിട്ടുണ്ട്. ഇത് പാലം വഴി കടന്നു പോകുന്ന വാഹനങ്ങള്‍ക്ക് ഭീഷണിയാണ്. ഇവ മാറ്റുന്നതിന് നടപടികളെടുക്കണമെന്നാണ് ജനങ്ങളുടെ ആവശ്യം.