കക്കാട്: നഗരത്തിനു സമീപമുള്ള കക്കാട് പുഴയിലെ മാലിന്യപ്രശ്‌നം രൂക്ഷമാകുന്നു. വെള്ളം മലിനമായി കറുപ്പുനിറമായ നിലയിലാണ്. വെള്ളം വറ്റിയ നിലയിലുള്ള പുഴയില്‍ പ്ലാസ്റ്റിക് മാലിന്യങ്ങള്‍ നിറഞ്ഞിട്ടുണ്ട്. വിവിധ ഭാഗങ്ങളില്‍ നിന്നും രാത്രി സമയത്ത് വാഹനങ്ങളില്‍ ലോഡുകണക്കിന് മാലിന്യങ്ങളാണ് പുഴയില്‍ തള്ളുന്നത്.
പുഴയെ മാലിന്യവിമുക്തമാക്കാനുള്ള ബോധവല്‍ക്കരണ പരിപാടികള്‍ ഗുണപ്രദമായിട്ടില്ല. പ്രദേശത്തെ കിണറുകളിലും വയല്‍പ്രദേശങ്ങളിലും ജലവിതാനം താഴാതെ നിലനിര്‍ത്തുന്ന വലിയ ജലസ്രോതസാണ് അധികൃതരുടെ അലംഭാവം കാരണം മാലിന്യം നിറയുന്നത്. കക്കാട് ടൗണില്‍നിന്ന് അതിരകം ഭാഗത്തേക്ക് റോഡിനു സമാന്തരമായുള്ള ഭാഗത്താണ് പുഴയില്‍ മാലിന്യപ്രശ്‌നം രുക്ഷമായത്. മാലിന്യം തള്ളുന്നവരെ കണ്ടെത്താന്‍ പ്രദേശത്ത് സി.സി.ടി.വി സ്ഥാപിക്കണമെന്നും രാത്രികാലത്ത് പൊലിസ് പട്രോളിങ് വേണമെന്നുമാണ് നാട്ടുകാരുടെ ആവശ്യം.