ജിദ്ദ:. സഊദിയിൽ നിന്നു ഏറ്റവും കൂടുതൽ പെട്രോളിതര ഉൽപന്നങ്ങൾ കയറ്റി അയച്ച രാജ്യങ്ങളുടെ പട്ടികയിൽ ഇന്ത്യ മൂന്നാം സ്ഥാനത്ത്. ജനുവരി മുതൽ നവംബർ അവസാനം വരെയുള്ള കാലത്ത് 196.93 ബില്യൺ റിയാലിന്റെ പെട്രോളിതര ഉൽപന്നങ്ങളാണ് സഊദി അറേബ്യ വിദേശ രാജ്യങ്ങളിലേക്ക് കയറ്റി അയച്ചത്. സഊദിയിൽ നിന്ന് ഏറ്റവുമധികം പെട്രോളിതര ഉൽപന്നങ്ങൾ ഇറക്കുമതി ചെയ്തത് ചൈനയാണ്. സഊദിയുടെ ആകെ പെട്രോളിതര കയറ്റുമതിയുടെ 16.4 ശതമാനവും ചൈനയിലേക്കായിരുന്നു. ചൈന 32.28 ബില്യൺ റിയാലിന്റെ പെട്രോളിതര ഉൽപന്നങ്ങളാണ് പതിനൊന്നു മാസത്തിനിടെ സഊദിയിൽ നിന്ന് ഇറക്കുമതി ചെയ്തത്. രണ്ടാം സ്ഥാനത്തുള്ള യു.എ.ഇ 26.53 ബില്യൺ റിയാലിന്റെ പെട്രോളിതര ഉൽപന്നങ്ങൾ ഇറക്കുമതി ചെയ്തു. സഊദി കയറ്റുമതിയുടെ 13.5 ശതമാനം യു.എ.ഇയിലേക്കായിരുന്നു. പതിനൊന്നു മാസത്തിനിടെ സഊദി അറേബ്യ ഇന്ത്യയിലേക്ക് 12.73 ബില്യൺ റിയാലിന്റെ പെട്രോളിതര ഉൽപന്നങ്ങൾ കയറ്റി അയച്ചു. സഊദി കയറ്റുമതിയുടെ 6.5 ശതമാനം ഇന്ത്യയിലേക്കായിരുന്നു. 2018 ൽ ഇതേ കാലയളവിൽ 12.08 ബില്യൺ റിയാലിന്റെ പെട്രോളിതര ഉൽപന്നങ്ങളാണ് ഇന്ത്യയിലേക്ക് കയറ്റി അയച്ചത്.
നാലാം സ്ഥാനത്തുള്ള സിങ്കപ്പുരിലേക്ക് ആകെ പെട്രോളിതര കയറ്റുമതിയുടെ 6.2 ശതമാനവും അഞ്ചാം സ്ഥാനത്തുള്ള തുർക്കിയിലേക്ക് 3.6 ശതമാനവും ആറാം സ്ഥാനത്തുള്ള ബെൽജിയത്തിലേക്ക് 3.2 ശതമാനവും ഏഴാം സ്ഥാനത്തുള്ള കുവൈത്തിലേക്ക് 3.1 ശതമാനവും എട്ടാം സ്ഥാനത്തുള്ള അമേരിക്കയിലേക്ക് 2.9 ശതമാനവും ഒമ്പതാം സ്ഥാനത്തുള്ള ബഹ്‌റൈനിലേക്ക് 2.8 ശതമാനവും പത്താം സ്ഥാനത്തുള്ള ഈജിപ്തിലേക്ക് 2.6 ശതമാനവും നടത്തി.
അതേ സമയം 2018 നെ അപേക്ഷിച്ച് കഴിഞ്ഞ വർഷം കയറ്റുമതി 8.7 ശതമാനം തോതിൽ കുറഞ്ഞു. 2018 ആദ്യത്തെ പതിനൊന്നു മാസത്തിനിടെ 215.65 ബില്യൺ റിയാലിന്റെ പെട്രോളിതര ഉൽപന്നങ്ങൾ സഊദി അറേബ്യ വിദേശങ്ങളിലേക്ക് കയറ്റി അയച്ചിരുന്നു. കഴിഞ്ഞ കൊല്ലം ആദ്യത്തെ പതിനൊന്നു മാസത്തിനിടെ കയറ്റുമതിയിൽ 18.72 ബില്യൺ റിയാലിന്റെ കുറവാണുണ്ടായത്.