കുഴല്‍മന്ദം : ജില്ലയിലെ കര്‍ഷകരില്‍ നിന്നും തുച്ഛമായ തുകയ്ക്ക് ഭൂമി പാട്ടത്തിനെടുത്ത് ലാഭം കൊയ്യുന്നത് അയല്‍ ജില്ലകളിലെ ഭൂമാഫിയ തലവന്മാരെന്ന് ആരോപണം. അനധികൃത ഇഷ്ടികചൂളകളില്‍ റവന്യൂ സംഘം പരിശോധന നടത്തുമ്പോള്‍ തടസ്സം നില്‍ക്കുന്നവര്‍ ജില്ലയിലെ കര്‍ഷകരല്ലെന്നും പകരം ഭൂമി പാട്ടത്തിനെടുത്ത് വന്‍തുക തട്ടുന്ന സംഘങ്ങളെന്നുമാണ് ലഭിക്കുന്ന വിവരം. ജില്ലാ കളക്ടറും റവന്യൂ സംഘവും അനധികൃത ചൂളകളിലെ കുടിവെള്ളം ദുരുപയോഗം തടയുന്നതിനും മറ്റും നടത്തിയ പരിശോധനയിലാണ് സംഘത്തെ എതിര്‍ക്കുന്നതിനും ഭീഷണിപ്പെടുത്തുന്നതിനും എത്തിയത് പ്രദേശവാസികളല്ലെന്ന് വ്യക്തമായത്. ഇവര്‍ക്കെതിരെ കേസെടുക്കുന്നതും ദുഷ്‌ക്കരമാണ്.
പലരും നല്‍കുന്ന വിലാസങ്ങള്‍ പലപ്പോഴും വ്യാജമാണെന്നും കണ്ടെത്തിയിട്ടുണ്ട്. നിസ്സാര തുക മുന്‍കൂര്‍ നല്‍കി രേഖകള്‍ നിര്‍മ്മിച്ച് കര്‍ഷകരെയും ജില്ലയിലെ ഭൂ ഉടമകളെയും വഞ്ചിച്ച് കേസില്‍ കുടുക്കുന്നവര്‍ പലരും പിന്നീട് പ്രത്യക്ഷപ്പെടാറില്ലെന്നും കണ്ടെത്തി. ചൂള നടത്തുന്നതും തൊഴിലാളികളെ എത്തിക്കുന്നതും അന്യജില്ലകളില്‍ നിന്നുള്ള മാഫിയകളാണ്. തൊഴിലാളികളായെത്തുന്നതും അന്യസംസ്ഥാനക്കാര്‍ തന്നെ.
തുച്ഛമായ തുക മുന്‍കൂര്‍ നല്‍കിയാണ് തൊഴിലാളി സംഘങ്ങളെ ഇവര്‍ എത്തിക്കുന്നതെന്നും വ്യക്തമാണെന്ന് ബന്ധപ്പെട്ടവര്‍ പറയുന്നു. കഴിഞ്ഞ ആഴ്ച കളക്‌ട്രേറ്റിലേക്ക് നടത്തിയ മാര്‍ച്ചില്‍ അരദിവസത്തെ കൂലിയായിരുന്നു പങ്കെടുത്ത തൊഴിലാളികള്‍ക്ക് നല്‍കിയത്. തുടര്‍ന്ന് തൃശൂര്‍ സ്വദേശിയുടെ നേതൃത്വത്തില്‍ ജില്ലാകളക്ടറെ തടയാനും ശ്രമമുണ്ടായിരുന്നു. കഴിഞ്ഞ ദിവസം കുഴല്‍മന്ദം പോലീസ് സ്റ്റേഷന്‍ പരിധിയില്‍ ജില്ലാകളക്ടറും സംഘവും അനധികൃത ചൂള പിടിച്ചെടുക്കാന്‍ എത്തിയപ്പോള്‍ ദേഹത്ത് മണ്ണെണ്ണ ഒഴിച്ച് തീ കൊളുത്തി ആത്മഹത്യചെയ്യാന്‍ ശ്രമിച്ചതും പ്രദേശവാസിയായിരുന്നില്ലെന്നാണറിയുന്നത്. ഇത്തരം സംഭവങ്ങള്‍ ആവര്‍ത്തിക്കുന്നത് തടയാന്‍ വില്ലേജ് ഓഫീസറുടെ നേതൃത്വത്തില്‍ ബോധവത്കരണവും ജലസരക്ഷണ മാര്‍ഗ്ഗങ്ങളും കര്‍ഷകര്‍ക്ക് നല്‍കണമെന്ന് ആവശ്യമുയരുന്നു.