സ്വന്തം ലേഖകന്‍

തിരുവനന്തപുരം: സര്‍ക്കാര്‍ വാഗ്ദാന ലംഘനത്തെതുടര്‍ന്ന് എന്‍ഡോസള്‍ഫാന്‍ ദുരിതബാധിതര്‍ വീണ്ടും തെരുവില്‍. ഒരു വര്‍ഷം മുന്‍പ് സെക്രട്ടേറിയറ്റിനു മുന്‍പില്‍ നടത്തിയ അമ്മമാരുടെ പട്ടിണി സമരം മുഖ്യമന്ത്രിയുമായി നടത്തിയ ചര്‍ച്ചയെ തുടര്‍ന്ന് അവസാനിപ്പിക്കുകയായിരുന്നു. 

അന്ന് സര്‍ക്കാര്‍ നല്‍കിയ വാഗ്ദാനങ്ങള്‍ നടപ്പിലാക്കാതെ വന്നതോടെയാണ് ഒരു വര്‍ഷത്തെ കാത്തിരിപ്പിനു ശേഷം എന്‍ഡോസള്‍ഫാന്‍ രോഗബാധിതരും അവരുടെ കുടുംബാംഗങ്ങളും സെക്രട്ടേറിയറ്റിനു മുന്നില്‍ വീണ്ടും പ്രതിഷേധവുമായെത്തിയത്.  

എന്‍ഡോസള്‍ഫാന്‍ പീഡിത ജനകീയ മുന്നണി സെക്രട്ടേറിയറ്റിന്റെ മുന്നിലേക്ക് നടത്തിയ മാര്‍ച്ചും ധര്‍ണയും കെ.പി.സി.സി മുന്‍ അധ്യക്ഷന്‍ വി.എം സുധീരന്‍ ഉദ്ഘാടനം ചെയ്തു. 

എന്‍ഡോസള്‍ഫാന്‍ ദുരിതബാധിതരെ വീണ്ടും സമരത്തിലേക്ക് വലിച്ചിഴക്കുന്ന സര്‍ക്കാര്‍ നടപടി ജനാധിപത്യഭരണകൂടങ്ങള്‍ക്ക് അപമാനമാണെന്ന് സുധീരന്‍ പറഞ്ഞു.

 സര്‍ക്കാരിന്റെ തെറ്റായ സമീപനമാണ് ഇവര്‍ വീണ്ടും സമരത്തിനെത്തിയതിനു കാരണം. ഇനിയും ഒരു സമരത്തിന് അമ്മമാരെയും കുട്ടികളെയും തെരുവിലിറക്കരുത്. അവരുടെ പ്രശ്‌നങ്ങള്‍ പരിഹരിക്കുന്നതിനായി സര്‍ക്കാര്‍ അടിയന്തരമായി ഇടപെടണം. ഇക്കാര്യം ആവശ്യപ്പെട്ടുകൊണ്ട് മുഖ്യമന്ത്രിക്ക് താന്‍ കത്തുനല്‍കിയിട്ടുണ്ടെന്നും സുധീരന്‍ പറഞ്ഞു.

മനുഷ്യാവകാശ പ്രവര്‍ത്തക ദയാബായിയുടെ നേതൃത്വത്തില്‍ നടന്ന പ്രതിഷേധത്തില്‍ നൂറുകണക്കിന് ദുരിതബാധിതര്‍ പങ്കെടുത്തു.  ദുരിതബാധിതരുടെ പ്രശ്‌നങ്ങള്‍ അവതരിപ്പിച്ചുകൊണ്ട് ദയാബായിയുടെ നാടകവും അരങ്ങേറി. എസ്. രാജീവന്‍, ബാപ്പുജി, സക്കീര്‍ നേമം, ജോസ് ചാലക്കുടി, സാജന്‍ വേളൂര്‍, സ്വീറ്റാ ദാസന്‍, ഷാഫി സുഗിരി, മാഗ്ലിന്‍ തുടങ്ങിയവര്‍ സന്നിഹിതരായിരുന്നു.