കോട്ടയം: കുറുവിലങ്ങാട് എം.സി റോഡില്‍ കാര്‍ നിയന്ത്രണം വിട്ട് ലോറിയില്‍ ഇടിച്ച് ഒരു കുടുംബത്തിലെ അഞ്ച് പേര്‍ മരിച്ചു. കോട്ടയം തിരുവാതുക്കല്‍ സ്വദേശികളായ വേളൂര്‍ ഉള്ളാട്ടില്‍പാതി വീട്ടില്‍ തമ്പി(68), ഭാര്യ വത്സല(65), തമ്പിയുടെ മകന്‍ ബിനോയിയുടെ ഭാര്യ പ്രഭ(46), മകന്‍ അമ്പാടി(19), പ്രഭയുടെ അമ്മ ഉഷ എന്നിവരാണ് മരിച്ചത്.

ഇന്ന് പുലര്‍ച്ചെ 12.30ഓടെയാണ് അപകടം നടന്നത്. പാലക്കാട്ട് പോയി മടങ്ങുകയായിരുന്ന സംഘം സഞ്ചരിച്ച കാര്‍ നിയനന്ത്രണം വിട്ട് എതിരേ വന്ന തടിലോറിയില്‍ ഇടിക്കുകയായിരുന്നു. അമ്പാടിയാണ് കാര്‍ ഓടിച്ചിരുന്നത്. ഉറങ്ങിപ്പോയതാകാം അപകടകാരണമെന്നാണ് കരുതുന്നത്. പൂര്‍ണമായും തകര്‍ന്ന കാറില്‍ നിന്നും ഏറെ പണിപ്പെട്ടാണ് എല്ലാവരെയും പുറത്തെടുത്തത്.

ഉടന്‍ തന്നെ കോട്ടയം മെഡിക്കല്‍ കോളജ് ആശുപത്രിയിലെത്തിച്ചെങ്കിലും രക്ഷിക്കാനായില്ല. പെരുമ്പാവൂരിലേക്ക് തടിയുമായി പോകുകയായിരുന്നു ലോറി. മൃതദേഹങ്ങള്‍ കോട്ടയം മെഡിക്കല്‍ കോളജ് ആശുപത്രിയില്‍ സൂക്ഷിച്ചിരിക്കുകയാണ്.