കട്ടക്ക്: വിജയ് ഹസാരെ ട്രോഫി ഏകദിന പോരാട്ടത്തില്‍ കേരളത്തിനു വീണ്ടും തോല്‍വി. മഹാരാഷ്ട്രയുമായുള്ള മത്സരത്തില്‍ കേരളം 122 റണ്‍സിനാണു പരാജയപ്പെട്ടത്. ആദ്യം ബാറ്റു ചെയ്ത മഹാരാഷ്ട്ര നിശ്ചിത 50 ഓവറില്‍ 311 റണ്‍സെടുത്തപ്പോള്‍ കേരളത്തിന്റെ പോരാട്ടം 39.5 ഓവറില്‍ 189 റണ്‍സില്‍ അവസാനിച്ചു. കഴിഞ്ഞ ദിവസം കേരളം ത്രിപുരയോടും പരാജയമേറ്റു വാങ്ങിയിരുന്നു.
കേരളത്തിന്റെ മുന്‍നിര ബാറ്റിങ് തകര്‍ന്നതാണു തിരിച്ചടിയായത്. 72 റണ്‍സെടുക്കുന്നതിനിടെ ആറു വിക്കറ്റുകള്‍ നഷ്ടപ്പെട്ട് തകര്‍ച്ചയിലേക്ക് കൂപ്പുകുത്തിയ കേരളത്തെ ഏഴാം വിക്കറ്റില്‍ മുഹമ്മദ് അസ്ഹറുദ്ദീനും ഇഖ്ബാല്‍ അബ്ദുല്ലയും ചേര്‍ന്നു കരകയറ്റാന്‍ ശ്രമിച്ചെങ്കിലും അനിവാര്യമായ തോല്‍വി ഒഴിവാക്കാനായില്ല. 60 റണ്‍സെടുത്ത ഇഖ്ബാല്‍ അബ്ദുല്ലയാണു ടോപ് സ്‌കോറര്‍. അസഹ്‌റുദ്ദീന്‍ 50 റണ്‍സ് കണ്ടെത്തി. മറ്റൊരാള്‍ക്കും കാര്യമായൊന്നും ചെയ്യാന്‍ സാധിച്ചില്ല. മഹാരാഷ്ട്രയ്ക്കായി പ്രദീപ് ദാധെ നാലും ജഗദീഷ് സോപെ രണ്ടും വിക്കറ്റുകള്‍ വീഴ്ത്തി.
നേരത്തെ റുതുരാജ് ഗെയ്ക്‌വാദ് (79), നായകന്‍ കേദാര്‍ ജാദവ് (71), നൗഷാദ് ഷെയ്ഖ് (57) എന്നിവരുടെ ബാറ്റിങ് മികവിലാണു മഹാരാഷ്ട്ര മികച്ച സ്‌കോര്‍ സ്വന്തമാക്കിയത്. ജാദവ് അഞ്ചു വീതം സിക്‌സും ഫോറും പറത്തി 48 പന്തിലാണു 71 റണ്‍സെടുത്തത്. കേരളത്തിനായി ജലജ് സക്‌സേന നാലു വിക്കറ്റുകള്‍ വീഴ്ത്തി. സന്ദീപ് വാര്യര്‍, കൃഷ്ണ കുമാര്‍, വിനോദ് കുമാര്‍, രോഹന്‍ പ്രേം എന്നിവര്‍ ഓരോ വിക്കറ്റും വീഴ്ത്തി.