കുട്ടനാട് (ആലപ്പുഴ): ലോറി പാഞ്ഞുകയറിയതിനെ തുടര്‍ന്ന് വീടിന്റെ ഭിത്തി തകര്‍ന്നു വീണ് വീടിനുള്ളില്‍ ഉറങ്ങിക്കിടന്നിരുന്ന വീട്ടമ്മ മരിച്ചു. ചമ്പക്കുളം ഗ്രാമപഞ്ചായത്ത് ഒന്നാം വാര്‍ഡ് പതിനെട്ടില്‍ചിറ പരേതനായ പുഷ്‌കരന്റെ ഭാര്യ രാജമ്മ (68) യാണ് മരിച്ചത്.
പുലര്‍ച്ചെ മൂന്നോടെ ആലപ്പുഴ- ചങ്ങനാശേരി റോഡിലായിരുന്നു അപകടം. ചാക്കുകെട്ടുകളുമായി വന്ന ലോറിയാണ് അപകടത്തിനിടയാക്കിയത്.
ഇടിയുടെ ആഘാതത്തില്‍ മുന്‍വശത്തുള്ള മുറിയില്‍ കിടന്നുറങ്ങുകയായിരുന്ന രാജമ്മയുടെ മുകളിലേക്കു വീടിന്റെ ഭിത്തിയും മേല്‍ക്കൂരയും തകര്‍ന്നു വീഴുകയായിരുന്നു. അപകടത്തെത്തുടര്‍ന്ന് ലോറി ഡ്രൈവര്‍ ഓടിരക്ഷപെട്ടു. ശബ്ദം കേട്ട് ഓടിക്കൂടിയ നാട്ടുകാര്‍ രാജമ്മയെ പുറത്തെടുത്ത് വണ്ടാനം മെഡിക്കല്‍ കോളജ് ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. മക്കള്‍: ബിജു, ഷാജി, പരേതനായ അജി.