കല്‍പ്പറ്റ: വയനാട് വനമേഖലയില്‍ ഉള്‍പ്പെടെ മാവോയിസ്റ്റ് സാന്നിധ്യം വര്‍ധിച്ചുവരുന്നതായി ചീഫ് സെക്രട്ടറി ടോം ജോസ്. മാവോയിസ്റ്റുകള്‍ക്ക് കീഴടങ്ങാന്‍ സര്‍ക്കാര്‍ പ്രഖ്യാപിച്ച പാക്കേജ് വേണ്ടിവന്നാല്‍ പുനപരിശോധിക്കുമെന്നും ചീഫ് സെക്രട്ടറി പറഞ്ഞു.
കല്‍പ്പറ്റയില്‍ വിവിധ വകുപ്പു മേധാവികള്‍ പങ്കെടുത്ത ഉന്നതതല യോഗത്തിന് ശേഷം മാധ്യമ പ്രവര്‍ത്തകരോട് സംസാരിക്കുകയായിരുന്നു അദ്ദേഹം. മാവോയിസ്റ്റ് ഭീഷണി നിലനില്‍ക്കുന്ന സാഹചര്യത്തില്‍ ആദിവാസി കോളനികളില്‍ അടിസ്ഥാന സൗകര്യങ്ങള്‍ ഒരുക്കുമെന്നും ചീഫ് സെക്രട്ടറി പറഞ്ഞു. വയനാട്ടില്‍ ഉള്‍പ്പെടെ വിവിധ ജില്ലകളില്‍ നിലനില്‍ക്കുന്ന മാവോയിസ്റ്റ് ഭീഷണിയുടെ പശ്ചാത്തലത്തിലാണ് കല്‍പ്പറ്റയില്‍ ഉന്നതതല യോഗം ചേര്‍ന്നത്. ചീഫ് സെക്രട്ടറി ടോം ജോസ്, ഡി.ജി.പി ലോക്‌നാഥ് ബഹ്‌റ, ഐ.ജിമാര്‍, വിവിധ ജില്ലകളിലെ പൊലിസ് മേധാവികള്‍, മലബാര്‍ ജില്ലകളിലെ കലക്ടര്‍മാര്‍, വിവിധ വകുപ്പുകളുടെ മേധാവിമാരും യോഗത്തില്‍ പങ്കെടുത്തു.
ആദിവാസി മേഖലയിലെ ശോചനീയാവസ്ഥ മുതലെടുത്ത് ആദിവാസികളെ മാവോയിസ്റ്റുകള്‍ സ്വാധീനിക്കുന്നത് എങ്ങനെ ഇല്ലാതാക്കാം എന്നതു സംബന്ധിച്ചുള്ള ആലോചനയാണ് പ്രധാനമായും യോഗത്തില്‍ നടന്നത്. ജില്ലയിലെ പല ആദിവാസി കോളനികളിലും മാവോയിസ്റ്റുകള്‍ ഇടയ്ക്കിടെ സന്ദര്‍ശനം നടത്താറുണ്ട്. ഇവിടെയെല്ലാം കോളനികളിലെ ശോചനീയാവസ്ഥ ഉള്‍പ്പെടെ മാവോയിസ്റ്റുകള്‍ ആദിവാസികളുമായി സംസാരിച്ചിരുന്നു. ഈ സാഹചര്യത്തിലാണ് പ്രത്യേകയോഗം ചേര്‍ന്നത്. ആദിവാസി മേഖലയിലെ പ്രശ്‌നങ്ങള്‍ പരിഹരിക്കുന്നതിനുള്ള ഗൗരവമേറിയ ഇടപെടല്‍ ഉണ്ടാകുമെന്ന് ചീഫ് സെക്രട്ടറി പറഞ്ഞു. മാവോയിസ്റ്റുകള്‍ക്ക് കീഴടങ്ങാന്‍ സര്‍ക്കാര്‍ പ്രഖ്യാപിച്ച പാക്കേജ് ഇപ്പോഴും നിലനില്‍ക്കുകയാണ്. വേണ്ടിവന്നാല്‍ പുനപരിശോധിക്കുമെന്നും ചീഫ് സെക്രട്ടറി പറഞ്ഞു.
മാവോയിസ്റ്റ് ഭീഷണി നിലനില്‍ക്കുന്ന സാഹചര്യത്തില്‍ ആദിവാസി കോളനികളില്‍ അടിസ്ഥാന സൗകര്യങ്ങള്‍ ഒരുക്കുമെന്നും ചീഫ് സെക്രട്ടറി പറഞ്ഞു. കഴിഞ്ഞ 18ന് ഡി.ജി.പിയുടെ നേതൃത്വത്തില്‍ വയനാട്ടില്‍ നടന്ന യോഗത്തില്‍ എടുത്ത തീരുമാനങ്ങളും വിലയിരുത്തി.