മുവാറ്റുപുഴ: രാജീവ് ഗാന്ധി പ്രധാനമന്ത്രിയായിരുന്ന കാലത്ത് പ്രൊപ്പോസല്‍ വരുകയും പിന്നീട് മുന്‍കാലങ്ങളിലെ എം.പിമാരുടെ ശ്രമഫലമായി പടിപടിയായി മുന്‍പോട്ടു പോകുകയും ചെയ്ത നിര്‍ദിഷ്ട അങ്കമാലി ശബരിമല റയില്‍വേ പാതയുടെ കാര്യത്തില്‍ ജോയ്‌സ് ജോര്‍ജ് എം.പിക്ക് ഫ്‌ളക്‌സ് ബോര്‍ഡ് വച്ചുള്ള ചിലവ് മാത്രമാണ് വന്നിട്ടുള്ളതെന്ന് യൂത്ത് കോണ്‍ഗ്രസ് സംസ്ഥാന പ്രസിഡന്റ് ഡീന്‍ കുര്യാക്കോസ് കുറ്റപ്പെടുത്തി.
മുന്‍ യു.പി.എ ഗവണ്‍മെന്റിന്റെ ഘട്ടത്തില്‍ എം.പി മാരായിരുന്ന പി.ടി തോമസും കെ.പി ധനപാലനും നടത്തിയ അശ്രാന്ത പരിശ്രമഫലമായി കാലടി വരെയുള്ള ഭൂമി ഏറ്റെടുത്ത് എട്ട് കി.മി റെയില്‍വെ ലൈന്‍ പൂര്‍ത്തിയാക്കുകയും ചെയ്തത്.
പിന്നീട് എല്ലാ ബജറ്റിലും പദ്ധതിയുടെ തുടര്‍ച്ചക്കായി പണമനുവദിച്ചിട്ടുമുണ്ട്. ജോയ്‌സ് ജോര്‍ജ് എം.പിയായതിനു ശേഷം മുവാറ്റുപുഴയിലെ ശബരി പാതയുടെ സ്‌പെഷ്യല്‍ ഓഫിസും സ്ഥലമെടുപ്പിനായുള്ള ഓഫിസും പൂട്ടി പോയിട്ടും അദ്ദേഹത്തിന് ഒന്നും ചെയ്യാനായിട്ടില്ല.
ഉമ്മന്‍ ചാണ്ടി ഗവണ്‍മെന്റിന്റെ കാലത്ത് പദ്ധതിയുടെ പകുതി തുക സംസ്ഥാന ഗവണ്‍മെന്റ് വഹിക്കാമെന്ന് തീരുമാനിച്ചു.
ഇടുക്കി ജില്ലയില്‍ പ്രവര്‍ത്തിച്ചിരുന്ന നെടുങ്കണ്ടം, വാഴത്തോപ്പ്, മൂന്നാര്‍, കുമളി എന്നിവടങ്ങളിലെ റെയില്‍വേ ടിക്കറ്റ് കൗണ്ടറുകള്‍ പൂട്ടി പോയത് അറിയാത്ത എം.പി ഒരു നിവേദനം പോലും നല്‍കിയതായി അറിവില്ല.
നെടുങ്കണ്ടത്ത് കൗണ്ടര്‍ നിലനിര്‍ത്തണമെന്നാവശ്യപ്പെട്ട് എന്‍.സി.സി ബറ്റാലിയന്‍ റെയില്‍വെ ഡിവിഷന്‍ മാനേജര്‍ക്ക് കത്തയക്കേണ്ട ഗതികേടില്‍ എത്തി. വസ്തുതയിതായിരിക്കെ പതിവനുസരിച്ച് കേന്ദ്ര ഗവണ്‍മെന്റ് ബജറ്റില്‍ പണം വകയിരുത്തിയപ്പോള്‍ അതിന്റെ അവകാശവാദം ഉന്നയിച്ച് തരം താണ പ്രവര്‍ത്തനമാണ് എം.പി ചെയ്തിരിക്കുന്നതെന്നും ഡീന്‍ കുര്യാക്കോസ് കുറ്റപ്പെടുത്തി.