ഫിലാഡല്‍ഫിയ: നിര്‍ണായകമായ മത്സരത്തില്‍ പരാഗ്വെയെ എതിരില്ലാത്ത ഒരു ഗോളിന് വീഴ്ത്തി അമേരിക്ക കോപ്പ അമേരിക്കയുടെ ക്വാര്‍ട്ടറില്‍ കടന്നു. ആദ്യ മത്സരം തോറ്റ് തുടങ്ങിയ അമേരിക്ക തുടര്‍ച്ചയായ രണ്ടാം ജയത്തോടെയാണ് ക്വാര്‍ട്ടറിലെത്തുന്നത്. അമേരിക്കന്‍ സൂപ്പര്‍ താരം ക്ലിന്‍ഡ് ഡെംപ്‌സിയാണ് ടീമിന്റെ വിജയ ഗോള്‍ നേടിയത്.

കോസ്റ്റ റിക്കയ്‌ക്കെതിരേ വമ്പന്‍ ജയം നേടിയ ടീമിനെ തന്നെയാണ് കോച്ച് യുര്‍ഗെന്‍ ക്ലിന്‍സ്മാന്‍ പരാഗ്വെയ്‌ക്കെതിരേയും കളത്തിലിറക്കിയത്. എന്നാല്‍ പരാഗ്വെ ടീമില്‍ വിക്ടര്‍ അയാളയും ഫാബിയാന്‍ ബാല്‍ബ്യൂണയും ആദ്യ ഇലവനില്‍ ഇടംപിടിച്ചു. അമേരിക്കയാണ് ആക്രമണത്തിന് തുടക്കമിട്ടത്. ഫാബിയാന്‍ ജോണ്‍സന്റെ മനോഹരമായ ഷോട്ട് പരാഗ്വെ ഗോളി ജസ്റ്റോ വില്ലാര്‍ കഷ്ടപ്പെട്ട് സേവ് ചെയ്യുകയായിരുന്നു. തൊട്ടടുത്ത നിമിഷം തന്നെ പരാഗ്വെ ഇതിനു മറുപടി നല്‍കി. പരാഗ്വെ താരങ്ങള്‍ നടത്തിയ കൗണ്ടര്‍ അറ്റാക്ക് ജോണ്‍ ബ്രൂക്‌സിന്റെ തകര്‍പ്പന്‍ പ്രതിരോധമില്ലായിരുന്നെങ്കില്‍ വലകുലുക്കിയേനെ. മിഖയേല്‍ ആല്‍മിരോണിന്റെ മികച്ചൊരു ഷോട്ട് ബ്രൂക്‌സ് പ്രതിരോധിക്കുകയായിരുന്നു. ഇതിനു ശേഷം ഡെംപ്‌സിയുടെ മനോഹരമായ ഫ്രീകിക്ക് ബാറിന് മുകളിലൂടെ പറന്നതോടെ പരാഗ്വെ അപകടം മണത്തു.

27ാം മിനുട്ടില്‍ അമേരിക്ക കാത്തിരുന്ന ഗോളെത്തി. ഇടതു വിങിലൂടെ സാര്‍ഡെസ് നടത്തിയ നീക്കങ്ങള്‍ പരാഗ്വെയ്ക്ക് വെല്ലുവിളിയുയര്‍ത്തി. മുന്നേറ്റത്തിനൊടുവില്‍ താരം നല്‍കിയ ക്രോസ് ഡെംപ്‌സി സൂപ്പര്‍ ഷോട്ടിലൂടെ ലക്ഷ്യത്തിലെത്തിക്കുകയായിരുന്നു. ആദ്യ പകുതി അവസാനിക്കാനിരിക്കെ പരാഗ്വെ സമനില ഗോള്‍ നേടേണ്ടതായിരുന്നു. എന്നാല്‍ ഡാരിയോ ലെസ്‌കാനോയുടെ ഷോട്ട് സേവ് ചെയ്ത് അമേരിക്കന്‍ ഗോളി ബ്രാഡ് ഗുസാന്‍ രക്ഷകനാവുകയായിരുന്നു.

രണ്ടാം പകുതിയുടെ തുടക്കത്തില്‍ തന്നെ അമേരിക്കയ്ക്ക് തിരിച്ചടിയേറ്റു. രണ്ടുമിനുട്ടിനിടെ രണ്ടു മഞ്ഞക്കാര്‍ഡ് വാങ്ങി ഡി ആന്‍ഡ്രെ യെഡ്‌ലിന്‍ പുറത്തുപോയതോടെ അമേരിക്ക പത്തുപേരായി ചുരുങ്ങി. എന്നാല്‍ പരാഗ്വെയ്ക്ക് ഇതു മുതലെടുക്കാന്‍ സാധിച്ചില്ല. ഗുസാന്‍ നിരന്തരം നടത്തിയ നീക്കങ്ങളെ നിശ്ചയദാര്‍ഢ്യത്തോടെ നേരിട്ട അമേരിക്ക മികച്ച രീതിയില്‍ ഈ നീക്കങ്ങളെ പ്രതിരോധിച്ചു. ഇടയ്ക്ക് സാര്‍ഡെസിന് ലീഡുയര്‍ത്താന്‍ അവസരം ലഭിച്ചെങ്കിലും ലക്ഷ്യം കാണാന്‍ സാധിച്ചില്ല.