മുവാറ്റുപുഴ: സംസ്‌കൃതത്തിന്റെയും സംഗീതത്തിന്റെയും മനുഷ്യന്റെ സാംസ്‌കാരിക തലത്തിലെ സ്വാധീനം തിരിച്ചറിഞ്ഞു പ്രവര്‍ത്തിച്ചാല്‍ സമൂഹത്തിലെ അക്രമവാസനകള്‍ ഇല്ലായ്മ ചെയ്യാനാകുമെന്ന് കാലടി സംസ്‌കൃത സര്‍വകലാശാല വൈസ് ചാന്‍സലര്‍ ഡോ ദിലീപ്കുമാര്‍ പറഞ്ഞു.
ഈ വിഷയത്തില്‍ നടന്ന വിവിധ പഠനങ്ങള്‍ ഇക്കാര്യം അടിവരയിട്ടു പറഞ്ഞിട്ടുണ്ട്. മൂവാറ്റുപുഴ തിരുവുംപ്ലാവില്‍ ദേവസ്വം സനാതന സ്‌കൂള്‍ ഓഫ് ലൈഫിന്റെ അഞ്ചാമത് വാര്‍ഷികാഘോഷം സര്‍ഗോത്സവത്തോടനുബന്ധിച്ചു നടന്ന സംസ്‌കൃത ഓഡിയോ ആല്‍ബം പ്രകാശനം ചെയ്തു സംസാരിക്കുകയായിരുന്നു അദ്ദേഹം.
വിശ്വസംസ്‌കൃതപ്രതിഷ്ഠാനം സംസ്ഥാനഅധ്യക്ഷന്‍ ഡോ. പി.കെ ശങ്കരനാരായണന്‍ അധ്യക്ഷത വഹിച്ചു. സംസ്‌കൃതഭാരതിയുടെ അമേരിക്കന്‍ ഐക്യനാടുകളിലെയും വിദേശരാജ്യങ്ങളിലെയും പ്രവര്‍ത്തനങ്ങള്‍ക്ക് നേതൃത്വം നല്‍കുന്ന ഡോ കെ.എന്‍ പത്മകുമാര്‍ മുഖ്യഭാഷണം നടത്തി. ആല്‍ബത്തിലെ ഗാനങ്ങള്‍ രചിച്ച ധനേഷ് നമ്പൂതിരി, ഗായകന്‍ പ്രവീണ്‍ കാമ്പ്രം, സനാതന സ്‌കൂള്‍ ഓഫ് ലൈഫ് ഡയറക്ടര്‍ നാരായണശര്‍മ എന്നിവര്‍ സംസാരിച്ചു. ക്ഷേത്ര അഡ്മിനിസ്‌ട്രേഷന്‍ ഡയറക്ടര്‍ മനോജ് കുമാര്‍ കലാകാരന്മാരെ ആദരിച്ചു.
സമ്മേളനാനന്തരം സനാതനസ്‌കൂള്‍ ഓഫ് ലൈഫ് വിദ്യാര്‍ത്ഥികള്‍ അവതരിപ്പിക്കുന്ന വിവിധ കലാപരിപാടികള്‍ അരങ്ങേറി. വിശ്വസംസ്‌കൃതപ്രതിഷ്ഠാനം നടത്തിയ വിവിധ സംസ്‌കൃതപരീക്ഷകളില്‍ വിജയികളായവര്‍ക്കുള്ള സര്‍ട്ടിഫിക്കറ്റുകളും ചടങ്ങില്‍ സമ്മാനിച്ചു.