തിരുവനന്തപുരം: കൊറോണ വൈറസ് ബാധ വ്യാപകമാകുന്നത് തടയുന്നതിനായി സ്വകാര്യ ആശുപത്രികള്‍ ഉള്‍പ്പെടെ സജ്ജമാണെന്ന് ഇന്ത്യന്‍ മെഡിക്കല്‍ അസോസിയേഷന്‍ അറിയിച്ചു. 14 ജില്ലകളിലേയും ഡോക്ടര്‍മാര്‍ക്ക് കൊറോണ വൈറസ് ചികിത്സയുടെ വിവിധ വശങ്ങളെകുറിച്ചുള്ള തുടര്‍ വിദ്യാഭ്യാസ പരിപാടികള്‍ ആസൂത്രണം ചെയ്തുവരികയാണ്. എല്ലാ ജില്ലകളിലേയും സ്വകാര്യ ആശുപത്രികളുടെ സഹായം ഈ വിഷയത്തില്‍ ഐ.എം.എ വാഗ്ദാനം നല്‍കിയിട്ടുണ്ട്. ഐസൊലേഷന്‍ വാര്‍ഡുകളും ഇന്റെന്‍സീവ് കെയര്‍ യൂനിറ്റുകളും വെന്‍ഡിലേറ്ററും ഉള്ള സ്വകര്യ ആശുപത്രികള്‍ അടിയന്തിര ഘട്ടം എത്തിയാല്‍ ചികിത്സക്കായി മുന്നോട്ടു വരും. കേരളത്തിലെ നാല് വിമാന ത്താവളങ്ങളിലും ബയോ മെഡിക്കല്‍ വെയ്സ്റ്റ് നിര്‍മാര്‍ജനം ചെയ്യുന്നതിനായുള്ള നടപടി സ്വീകരിച്ചിട്ടുണ്ട്. സ്വകാര്യ ആശുപത്രികളിലെ മറ്റു ആരോഗ്യ പ്രവര്‍ത്തകര്‍ക്ക് പരിശീലനം നല്‍കുന്നതിനും സര്‍ക്കാരിന്റെ കൊറോണ വൈറസ് പ്രവര്‍ത്തനങ്ങള്‍ക്ക് പിന്തുണ നല്‍കുന്നതിനും നടപടികള്‍ സ്വീകരിച്ചിട്ടുണ്ട്.
തിരുവനന്തപുരത്തു ഇന്നലെ നടന്ന ഉന്നതതല യോഗം കൊറോണ വൈറസ് ബാധയെ തുടര്‍ന്നുണ്ടായ സ്ഥിതി വിശേഷം വിലയിരുത്തി. തുടര്‍ പ്രവര്‍ത്തനങ്ങള്‍ക്കായി സംസ്ഥാനതല മോണിറ്ററിങ് കമ്മിറ്റിയും ഐ.എം.എ സാംക്രമിക രോഗ നിവാരണ വിഭാഗവും ഗവേഷണ വിഭാഗവും സംയുക്തമായി ചേര്‍ന്ന് ഭാവി പരിപാടികള്‍ ആസൂത്രണം ചെയ്യുമെന്ന് സംസ്ഥാന പ്രസിഡന്റ് ഡോ. എബ്രഹാം വര്‍ഗീസും സെക്രട്ടറി ഡോ. ഗോപികുമാറും പ്രസ്താവനയില്‍ അറിയിച്ചു.