ആഷിഖ് അലി ഇബ്രാഹിം

മുക്കം: സംസ്ഥാനത്ത് വ്യാപകമായി ഉപയോഗിക്കുന്ന പി.വി.സി ഫ്‌ളക്‌സ് നിരോധിക്കണമെന്ന് വിദഗ്ധ കമ്മിറ്റി. ഫ്‌ളക്‌സ് നിരോധനത്തിന്റെ പ്രായോഗികത സംബന്ധിച്ച് പഠനം നടത്താന്‍ തദ്ദേശ സ്വയംഭരണ അഡിഷണല്‍ ചീഫ് സെക്രട്ടറി അധ്യക്ഷനായി സര്‍ക്കാര്‍ നിയോഗിച്ച കമ്മിറ്റിയുടേതാണ് ശുപാര്‍ശ. കേരളത്തില്‍ പ്രതിവര്‍ഷം ചുരുങ്ങിയത് 17 കോടി ചതുരശ്ര അടി (500 ടണ്‍) പി.വി.സി ഫ്‌ളക്‌സ് പ്രിന്റ് ചെയ്യുന്നുണ്ടെന്നാണ് കണക്ക്. പരസ്യ പ്രചാരണങ്ങള്‍ക്കായി ഇന്നു വളരെയധികം ഉപയോഗിക്കുന്ന പി.വി.സി ഫ്‌ളക്‌സ് പുനരുപയോഗിക്കാന്‍ കഴിയാത്ത ഒരിനം പ്ലാസ്റ്റിക്കാണ്.
ഉപയോഗശേഷം ഇത് കത്തിച്ചു കളയാനോ ഉപേക്ഷിക്കാനോ മാത്രമേ കഴിയുകയുള്ളൂ എന്നതിനാല്‍ വലിയ പാരിസ്ഥിതിക പ്രശ്‌നമാണ് ഇവ ഉണ്ടാക്കുന്നതെന്ന് സമിതി ചൂണ്ടിക്കാട്ടുന്നു. പി.വി.സി ഫ്‌ളക്‌സ് ശാസ്ത്രീയമായി സംസ്‌കരിക്കാന്‍ സംസ്ഥാനത്ത് സംവിധാനമില്ല. അതിനാല്‍ റീസൈക്കിള്‍ ചെയ്യാന്‍ സാധിക്കാത്തതും മണ്ണില്‍ അലിയാത്തതുമായ പി.വി.സി പ്ലാസ്റ്റിക് നിരോധിക്കണമെന്നാണ് സമിതിയുടെ കണ്ടെത്തല്‍.
പി.വി.സി ഫ്‌ളക്‌സ് ബോര്‍ഡുകള്‍ക്ക് പകരം പുനരുപയോഗിക്കാവുന്നതും പി.വി.സി മുക്തവുമായ പോളി എത്തിലിന്‍ നിര്‍മിതമോ, അതുപോലെയുള്ള വസ്തുക്കളോ ഉപയോഗിക്കാനാണ് സമിതി ശുപാര്‍ശ ചെയ്തിരിക്കുന്നത്. പോളി എത്തിലിന്‍ ഉപയോഗിച്ചുള്ള പരസ്യബോര്‍ഡുകള്‍ ഉപയോഗശേഷം റീസൈക്ലിങ് നടത്താമെന്നതിനാല്‍ പാരിസ്ഥിതിക അപായം സൃഷ്ടിക്കില്ല. വരാനിരിക്കുന്ന തെരഞ്ഞെടുപ്പ് അടക്കമുള്ള പരിപാടികളുടെ യാതൊരുവിധ പരസ്യ പ്രചാരണങ്ങള്‍ക്കും പി.വി.സി ഫ്‌ളക്‌സ് ഉപയോഗിക്കാനോ പ്രിന്റ് ചെയ്യാനോ അനുമതി നല്‍കരുതെന്നും കമ്മിറ്റി നിര്‍ദേശിക്കുന്നുണ്ട്.
സര്‍ക്കാര്‍ പരിപാടികളുടെയും സ്വകാര്യ, മതപരമായ ചടങ്ങുകളുടെയും പ്രചാരണത്തിനും പി.വി.സി ഫ്‌ളക്‌സ് ബോര്‍ഡോ ബാനറോ ഉപയോഗിക്കാന്‍ പാടില്ല. പരസ്യങ്ങള്‍ക്കും പ്രചാരണങ്ങള്‍ക്കും സര്‍ക്കാര്‍ അംഗീകൃതവും പ്രകൃതി സൗഹൃദവും റീസൈക്കിള്‍ ചെയ്യാവുന്നതുമായ പോളി എത്തിലിനോ, കോട്ടണ്‍ തുണിയോ മാത്രമേ ഉപയോഗിക്കാന്‍ അനുമതി നല്‍കാവൂ. പി.വി.സി ഫ്‌ളക്‌സിന്റെ അതെ ചെലവ് മാത്രമേ പോളി എത്തിലിന്‍ ഉപയോഗിക്കുമ്പോള്‍ വരുന്നുള്ളൂ. പ്രിന്റിങ് യന്ത്രങ്ങളും മാറ്റേണ്ടതില്ല. അതിനാല്‍ അച്ചടി സ്ഥാപനങ്ങളെയോ ജീവനക്കാരെയോ പി.വി.സി ഫ്‌ളെക്‌സ് നിരോധനം ബാധിക്കുകയില്ലെന്നും വിദഗ്ധ കമ്മിറ്റി ചൂണ്ടിക്കാട്ടുന്നുണ്ട്.

പി.വി.സിഫ്‌ളക്‌സ്  മനുഷ്യന് ദോഷകരം

പി.വി.സിയും (പോളി വിനൈല്‍ ക്ലോറൈഡ്) പോളിസ്റ്ററും ചേര്‍ത്തുണ്ടാക്കുന്ന മള്‍ട്ടി ലയര്‍ പ്ലാസ്റ്റിക്കുകളാണ് പി.വി.സി ഫ്‌ളക്‌സ്. ഏറ്റവും വീര്യമേറിയ വിഷമായ ഡയോക്‌സിനുകളുടെ വലിയ ഉറവിടമാണ് പി.വി.സി പ്ലാസ്റ്റിക്കുകള്‍. മനുഷ്യരിലെ രോഗപ്രതിരോധ വ്യവസ്ഥയുടെ പ്രവര്‍ത്തനത്തെ തളര്‍ത്തുകയും ഹോര്‍മോണ്‍ വ്യവസ്ഥകളുടെ നിര്‍ണായകമായ പ്രവര്‍ത്തനങ്ങളെ തടസപ്പെടുത്തുകയും അര്‍ബുദം പോലെയുള്ള മാരക രോഗങ്ങള്‍ക്ക് കാരണമാകുകയും ചെയ്യുന്ന മാരക രാസവിഷമാണ് ഡയോക്‌സിന്‍.പി.വി.സി ചൂടാക്കുകയോ കത്തിക്കുകയോ ചെയ്യുമ്പോള്‍ വന്‍തോതില്‍ ഡയോക്‌സിനുകള്‍ പുറത്തുവരും. ഇതു ജൈവ കോശങ്ങളുടെ വളര്‍ച്ച തടയുകയും പ്രത്യുല്‍പാദനത്തെയും ഭ്രൂണ വളര്‍ച്ചയെയും പ്രതികൂലമായി ബാധിക്കുകയും ചെയ്യും. പി.വി.സി പ്ലാസ്റ്റിക്കുകളില്‍ വന്‍തോതില്‍ അനുബന്ധമായി ഉപയോഗിക്കുന്ന രാസവസ്തുക്കളും വലിയ പാരിസ്ഥിതിക, ആരോഗ്യ പ്രശ്‌നങ്ങളാണ് സൃഷ്ടിക്കുന്നത്. ഇതുമൂലം പല രാജ്യങ്ങളും പി.വി.സി പ്ലാസ്റ്റിക്കുകള്‍ നിരോധിച്ചിട്ടുണ്ട്.