മുക്കം: നഗരസഭയുടെ പരിധിയിലൂടെ കടന്നുപോകുന്ന ഹൈവേ റോഡിലെ കലുങ്കുകള്‍, ഓവുചാലുകള്‍ തുടങ്ങിയവ പരിപാലിക്കേണ്ടത് നഗരസഭയെന്ന് ഹൈക്കോടതി. എടവണ്ണ- കൊയിലാണ്ടി സംസ്ഥാന പാത കടന്നുപോകുന്ന മുക്കം ബൈപാസ് റോഡിനടുത്ത് പൊതുമരാമത്ത് വകുപ്പ് നിര്‍മിച്ച പഴയ കലുങ്കിനടിയില്‍ അടിഞ്ഞുകൂടിയ മാലിന്യം നീക്കുന്നത് സംബന്ധിച്ച് മുക്കം സ്വദേശി അഡ്വ. അന്‍വര്‍ സാദിഖ് സമര്‍പ്പിച്ച റിട്ട് ഹര്‍ജിയുടെ പശ്ചാത്തലത്തിലാണ് കോടതി ഉത്തരവ്. കലുങ്ക് അടഞ്ഞത് മൂലം മഴക്കാലത്ത് റോഡിനടുത്തുള്ള വ്യാപാര സ്ഥാപനങ്ങളിലേക്കും കെട്ടിടങ്ങളിലേക്കും വെള്ളം ഒഴുകി നാശനഷ്ടങ്ങളും പരിസ്ഥിതി മലിനീകരണവും ഉണ്ടാകുന്നതായും പരാതിയില്‍ ചൂണ്ടിക്കാട്ടുന്നു. കഴിഞ്ഞ മഴക്കാലത്ത് മുക്കം നഗരസഭക്കും പൊതുമരാമത്ത് വകുപ്പിനും ജില്ലാ കലക്ടര്‍ക്കും പരാതി നല്‍കിയെങ്കിലും നടപടിയുണ്ടായില്ല. ഇതോടെയാണ് അന്‍വര്‍ സാദിഖ് ഹൈക്കോടതിയില്‍ റിട്ട് ഹര്‍ജി ഫയല്‍ ചെയ്തത്. പൊതുമരാമത്ത് നിര്‍മിച്ച കലുങ്കുകള്‍ നന്നാക്കേണ്ട ഉത്തരവാദിത്വമില്ലെന്ന് മുക്കം നഗരസഭ വാദമുന്നയിച്ചു. എന്നാല്‍ കേരള മുനിസിപ്പാലിറ്റി ആക്റ്റ് പ്രകാരം നഗരസഭയുടെ പരിധിയില്‍വരുന്ന ഹൈവേ റോഡിലെ കനാലുകള്‍, കലുങ്കുകള്‍ തുടങ്ങിയവ പരിപാലിക്കേണ്ട ഉത്തരവാദിത്വം മുനിസിപ്പാലിറ്റിക്കുണ്ടെന്ന് ഹൈക്കോടതി വ്യക്തമാക്കുകയായിരുന്നു. രണ്ടുമാസത്തിനുള്ളില്‍ പരാതിക്കാരന്റെ നിര്‍ദേശങ്ങള്‍കൂടി പരിഗണിച്ചശേഷം കലുങ്ക് നന്നാക്കി വെള്ളക്കെട്ട് പ്രശ്‌നം പരിഹരിച്ച് കൊടുക്കണമെന്ന് ഹൈക്കോടതി മുക്കം നഗരസഭക്ക് ഉത്തരവിലൂടെ നിര്‍ദേശം നല്‍കി.