ആറ്റിങ്ങല്‍: കുടിവെള്ള ക്ഷാമം അറുതിയില്ലാതെ തുടരുന്നു. ആറ്റിങ്ങല്‍ മേഖലയില്‍ ജനം നെട്ടോട്ടത്തിലാണ്. വാമനപുരം നദിയിലെ മിക്ക സ്ഥലങ്ങളും ഇതിനോടകം വറ്റി വരണ്ടണ്ടു കഴിഞ്ഞു. പല സ്ഥലങ്ങളിലും ആറിന്റെ ഒരു കരയില്‍ നിന്നും മറുകരയിലേയ്ക്ക് നടന്നു പോകാന്‍ പറ്റുന്ന സ്ഥിതിയാണ്. പതിനൊന്നു ജലപദ്ധതികളാണ് വാമനപുരം നദിയുടെ വിവിധ ഭാഗങ്ങളില്‍ നടപ്പാക്കിയിരിക്കുന്നത്. ഇവയെല്ലാം അവതാളത്തിലായിട്ടുണ്ട്. വക്കം, കടയ്ക്കാവൂര്‍, അഞ്ചുതെങ്ങ് തുടങ്ങി തീരദേശ നിവാസികളും വെള്ളത്തിനായി നെട്ടോട്ടമോടുകയാണ്.
വെള്ളറട: ഗ്രാമീണ മേഖലയില്‍ കുടിവെള്ളക്ഷാമം തുടരുന്നു. ജലസ്രോതസുകളധികവും വറ്റി വരണ്ടു. ജലവിതരണ വകുപ്പിന്റെ പൈപ്പുകളുടെ ചുവട്ടില്‍ പാത്രങ്ങളുടെ നീണ്ട നിരയാണ് ഉള്ളത്. വ്യാപക കൃഷിനാശവും സംഭവിച്ചിട്ടുണ്ട്. ഭീമമായ നഷ്ടമാണ് കര്‍ഷകര്‍ക്കുണ്ടായിരിക്കുന്നത്. ഉള്‍ഗ്രാമങ്ങളില്‍ കുടിവെള്ളത്തിനായി ജനം കിലോമീറ്ററുകളോളം നടക്കുകയാണ്. കേരളം-തമിഴ്‌നാട് അതിര്‍ത്തി പ്രദേശത്ത് ചിറ്റാര്‍ അണക്കെട്ടും വറ്റി.ഇപ്പോഴിങ്ങനെയെങ്കില്‍ മാര്‍ച്ച്, ഏപ്രില്‍ മാസങ്ങളിലെന്തായിരിക്കും സ്ഥിതിയെന്ന ആശങ്കയിലാണ് ജനം.