കരുനാഗപ്പള്ളി: ഓച്ചിറ അഴീക്കലില്‍ സദാചാര ഗുണ്ടായിസത്തിന്റെ മറവില്‍ യുവാവിന്റേയും യുവതിയുടേയും ദൃശ്യങ്ങള്‍ നവ മാധ്യമങ്ങളിലൂടെ പ്രചരിപ്പിച്ചതിനെ തുടര്‍ന്ന് യുവാവ് ആത്മഹത്യ ചെയ്ത സംഭവത്തിനെതിരേ ഡി.വൈ.എഫ്.ഐയുടെ നേതൃത്വത്തില്‍ പ്രതിഷേധ കൂട്ടായ്മ സംഘടിപ്പിച്ചു. 'ഇരകള്‍ക്കൊപ്പം' എന്ന പേരില്‍ കരുനാഗപ്പള്ളി ടൗണില്‍ നടന്ന പരിപാടിയില്‍ വിവിധ മേഖലകളില്‍ നിന്നുള്ള നിരവധി പേര്‍ പങ്കെടുത്തു.
പ്രതിഷേധ കൂട്ടായ്മ ലൈബ്രറി കൗണ്‍സില്‍ ജില്ലാ പ്രസിഡന്റ് ഡോ. പി.കെ ഗോപന്‍ ഉദ്ഘാടനം ചെയ്തു. ഡി.വൈ.എഫ്.ഐ കരുനാഗപ്പള്ളി ബ്ലോക്ക് പ്രസിഡന്റ് രഞ്ജിത്ത് അധ്യക്ഷത വഹിച്ചു. സെക്രട്ടറി റ്റി.ആര്‍ ശ്രീനാഥ്, ബി.എ ബ്രിജിത്ത്, എസ്.ആര്‍ അരുണ്‍ ബാബു, വി വിജയകുമാര്‍, ആര്‍ അശ്വതി തുടങ്ങിയവര്‍ സംസാരിച്ചു.