ന്യൂഡല്‍ഹി: ഗാന്ധിജിക്കെതിരെ അപമാനകരമായ പരാമര്‍ശവുമായി മുന്‍ കേന്ദ്രമന്ത്രിയും ബി.ജെ.പി എം.പിയുമായ അനന്ത്കുമാര്‍ ഹെഗ്‌ഡെ. ഗാന്ധിജി നയിച്ച സ്വാതന്ത്ര്യസമരം 'നാടകം' ആയിരുന്നുവെന്നാണ് ഹെഗ്‌ഡെയുടെ ആക്ഷേപം. വിഢിത്തങ്ങള്‍ വിളിച്ചു പറയുന്നതിന്റെ പേരില്‍ വാര്‍ത്തയില്‍ ഇടം നേടിയ ആളാണ് ഹെഗ്‌ഡെ.

ഇത്തരക്കാര്‍ ഇന്ത്യയില്‍ എങ്ങനെയാണ് മഹാത്മാ എന്ന് വിളിക്കപ്പെട്ടതെന്നും ബി.ജെ.പി എം.പി ചോദിച്ചു. ബംഗളൂരുവില്‍ ഒരു പൊതുപരിപാടിയില്‍ സംസാരിക്കുകയായിരുന്നു അദ്ദേഹം.

ബ്രിട്ടീഷുകാരുടെ സമ്മതത്തോടെയും പിന്തുണയോടെയുമാണ് ഇന്ത്യയില്‍ സ്വാതന്ത്ര്യ സമരം അരങ്ങേറിയതെന്നാണ് ബി.ജെ.പി എം.പിയുടെ പ്രസ്താവന.

'ഈ നേതാക്കള്‍ എന്ന് വിളിക്കപ്പെടുന്ന ആരെയും പൊലിസുകാര്‍ ഒരിക്കല്‍ പോലും തല്ലിയിട്ടില്ല. അവരുടെ സ്വാതന്ത്ര്യസമരം ഒരു വലിയ നാടകമായിരുന്നു. ബ്രിട്ടീഷുകാരുടെ അംഗീകാരത്തോടെ ഈ നേതാക്കള്‍ ആ നാടകം ഭംഗിയായി കളിച്ചു. അതൊരു യഥാര്‍ത്ഥ പോരാട്ടമായിരുന്നില്ല. വെറുമൊരു നീക്കുപോക്ക് സ്വാതന്ത്ര്യസമരമായിരുന്നു, ' ഹെഗ്‌ഡെ പറഞ്ഞു.

മഹാത്മാ ഗാന്ധിയുടെ നിരാഹാര സമരവും, സത്യഗ്രഹവും വെറുമൊരു നാടകം മാത്രമായിരുന്നുവെന്നും ഹെഗ്‌ഡെ ആരോപിച്ചു.

സത്യഗ്രഹവും സഹനസമരവും കൊണ്ടാണ് ഇന്ത്യയ്ക്ക് സ്വാതന്ത്ര്യം ലഭിച്ചതെന്നാണ് കോണ്‍ഗ്രസിനെ പിന്തുണയ്ക്കുന്ന ആളുകള്‍ പറയുന്നത്. അത് ശരിയല്ല. സത്യഗ്രഹം കാരണം ബ്രിട്ടീഷുകാര്‍ രാജ്യം വിട്ടിട്ടില്ലെന്നും അദ്ദേഹം പറഞ്ഞു.

'നിരാശ മൂലമാണ് ബ്രിട്ടീഷുകാര്‍ സ്വാതന്ത്രം തന്നത്. ചരിത്രം വായിക്കുമ്പോള്‍ എന്റെ രക്തം തിളച്ചു മറിയുകയാണ്. ഇത്തരം ആളുകളാണ് ഇന്ത്യയില്‍ മഹാത്മാവാകുന്നത്'- ഹെഗ്‌ഡെ പറഞ്ഞു.

ഉത്തര കന്നഡയില്‍ നിന്നുള്ള ലോക്‌സഭാ എം.പിയാണ് അനന്ത്കുമാര്‍ ഹെഗ്‌ഡെ.