ദോഹ: ഖത്തറിനെതിരേയുള്ള സഊദി നേതൃത്വത്തിലുള്ള നാല് രാഷ്ട്രങ്ങളുടെ ഗള്‍ഫ് ഉപരോധം ദീര്‍ഘമായി നീട്ടിക്കൊണ്ടുപോയെന്ന് സ്റ്റേറ്റ് സെക്രട്ടറി മൈക് പോംപിയോ. പ്രസിഡന്റ് ട്രംപും താനും അങ്ങനെയാണ് വിശ്വസിക്കുന്നത്. തര്‍ക്കങ്ങളുടെ ലാഭം ശത്രുക്കള്‍ക്ക് മാത്രമാണെന്നും അത് പരസ്പരമുള്ള ധാരണയെ ദോഷകരമായി ബാധിക്കുമെന്നും അദ്ദേഹം പറഞ്ഞു.
പശ്ചിമേഷ്യന്‍ സന്ദര്‍ശനത്തിന്റെ ഭാഗമായി ഖത്തറില്‍ വാര്‍ത്താസമ്മേളനത്തില്‍ സംസാരിക്കുകയായിരുന്നു അദ്ദേഹം. ഒരുമിച്ച് പ്രവര്‍ത്തിക്കുമ്പോഴാണ് നമ്മളെല്ലാം ശക്തരാകുന്നത്. ഇരു രാജ്യങ്ങള്‍ക്കിടിയിലെയും തര്‍ക്കങ്ങള്‍ ഉപകാരപ്രദമാവില്ലെന്ന് അദ്ദേഹം പറഞ്ഞു.
എന്നാല്‍, ഉപരോധം അവസാനിപ്പിക്കുന്നതിന്റെ സൂചനകളൊന്നും പോംപിയോ നല്‍കിയില്ല. അതിനിടെ മാധ്യമപ്രവര്‍ത്തകന്‍ ജമാല്‍ ഖഷോഗിയെ കൊലപ്പെടുത്തിയവരുടെ ഉത്തരവാദിത്തം സഊദി ഏറ്റെടുക്കണമെന്നും അദ്ദേഹം ആവശ്യപ്പെട്ടു. ഇതുസംബന്ധിച്ച് സഊദി കീരീടാവകാശിയോട് ചോദിക്കും. കൊലപാതകത്തിലെ ചര്‍ച്ച തുടരുമെന്നും അദ്ദേഹം കൂട്ടിച്ചേര്‍ത്തു. ഖഷോഗി വധത്തില്‍ പങ്കുള്ളവരെന്ന് കരുതുന്നവരുടെ വിചാരണ ആരംഭിച്ചെങ്കിലും സംഭവത്തില്‍ കിരീടാവകാശിക്ക് പങ്കില്ലെന്നാണ് സഊദി നിലപാട്.