കണ്ണൂര്‍: ഇസ്‌ലാം മതത്തേയും ടിപ്പു സുല്‍ത്താനേയും അധിക്ഷേപിച്ചു വിവാദ പ്രസംഗം നടത്തിയ ഫാദര്‍ ജോസഫ് പുത്തന്‍പുരയ്ക്കലിനെതിരേ നിയമ നടപടി സ്വീകരിക്കണമെന്നാവശ്യപ്പെട്ട് പൊലിസിനു പരാതി ലഭിച്ചു. പഴയങ്ങാടി സ്വദേശി ബി. തന്‍വീര്‍ അഹമ്മദാണ് ജില്ലാ പൊലിസ് മേധാവിക്ക് പരാതി നല്‍കിയത്. സാമൂഹിക മാധ്യമങ്ങള്‍ വഴി പ്രചരിച്ച പ്രസംഗം വര്‍ഗീയ വിദ്വേഷം പരത്തുന്നതാണെന്നാണ് ആക്ഷേപം. ഭരണഘടനയോടും നീതിന്യായ വ്യവസ്ഥയോടുള്ള അനാദരവും പ്രകടമാകുന്നു നടപടി ഇന്ത്യന്‍ ശിക്ഷാനിയമത്തിലെ 153 എ, 153 ബി എന്നീ വകുപ്പുകള്‍ പ്രകാരം ശിക്ഷാര്‍ഹമായ കുറ്റമാണെന്നും ഇതിനെതിരേ നിയമ നടപടി സ്വീകരിക്കണമെന്നും പരാതിയില്‍ പറയുന്നു. കഴിഞ്ഞദിവസം നടത്തിയ വിവാദ പ്രസംഗത്തിനെതിരേ പ്രതിഷേധം ശക്തമായപ്പോള്‍ ഫാദര്‍ മാപ്പ് പറഞ്ഞിരുന്നു.