മൂവാറ്റുപുഴ: നിയോജകമണ്ഡലത്തിലെ റോഡുകളുടെ അറ്റകുറ്റപ്പണികള്‍ക്കും നവീകരണത്തിനുമായി പൊതുമരാമത്ത് വകുപ്പില്‍ നിന്നും 50 ലക്ഷം രൂപ അനുവദിച്ചതായി എം.എല്‍.എ അറിയിച്ചു. മൂവാറ്റുപുഴ നഗരസഭയിലെ വാഴപ്പിള്ളി ജങ്ഷനിലെ വെള്ളകെട്ടിന് പരിഹാരം കാണാന്‍ റോഡില്‍ ടൈല്‍സ് വിരിക്കുന്നതിന് 15 ലക്ഷവും മൂവാറ്റുപുഴ കാക്കനാട് റോഡിലെ സിവില്‍ സ്റ്റേഷന്‍ ജങ്ഷന്‍ മുതല്‍ വീട്ടൂര്‍ വരെയുള്ള ഭാഗത്തെ അറ്റകുറ്റപ്പണിക്കായി 10 ലക്ഷം രൂപയും അനുവദിച്ചു.
പായിപ്ര പഞ്ചായത്തിലെ അമ്പലംപടിവീട്ടൂര്‍ റോഡിന്റെ അറ്റകുറ്റപ്പണികള്‍ക്കായി അഞ്ച് ലക്ഷം രൂപയും ആവോലി പഞ്ചായത്തിലെ ആവോലി കാരമറ്റം രണ്ടാര്‍ റോഡിന് 10 ലക്ഷവും മാറാടി പഞ്ചായത്തിലെ വലിയപാടം മാറാടി റോഡിന് അഞ്ച് ലക്ഷം രൂപയും അടക്കമാണ് 50 ലക്ഷം രൂപ അനുവദിച്ചത്. റോഡുകളുടെ നിര്‍മാണ പ്രവര്‍ത്തനങ്ങള്‍ ഉടന്‍ ആരംഭിക്കുമെന്ന് എം.എല്‍.എ അറിയിച്ചു.