ഇരിക്കൂര്‍(കണ്ണൂര്‍): സംസ്ഥാനത്തെ സ്‌കൂളുകളില്‍ രാവിലെ ക്ലാസ് മുറികളില്‍ കുട്ടികളെ പ്രവേശിപ്പിക്കുന്നതിന് മുന്‍പ് അധ്യാപകരോ മറ്റു ജീവനക്കാരോ പി.ടി.എ ഭാരവാഹികളോ പ്രതിനിധികളോ അവ തുറന്ന് പരിശോധിക്കണമെന്ന് പൊതുവിദ്യാഭ്യാസ ഡയരക്ടര്‍ (ഡി.പി.ഐ) ഉത്തരവിറക്കി. കഴിഞ്ഞ വര്‍ഷാവസാനം വയനാട് സര്‍വജന ഗവ. ഹയര്‍ സെക്കന്‍ഡറി സ്‌കൂളിലെ ക്ലാസ് മുറിയില്‍ വച്ച് പാമ്പുകടിയേറ്റ് വിദ്യാര്‍ഥിനി മരിച്ച ദാരുണ സംഭവത്തിന്റെ പാശ്ചാത്തലത്തില്‍ കുട്ടികളുടെ സുരക്ഷ ഉറപ്പു വരുത്തുന്നതിന്റെ ഭാഗമായാണ് കര്‍ശന നിര്‍ദേശം നല്‍കിയത്.
ഇത്തരത്തില്‍ നേരത്തെ നിര്‍ദേശം നല്‍കിയിരുന്നു. എന്നാല്‍ അതിനു ശേഷവും ചില സ്‌കൂളുകളിലും കോമ്പൗണ്ടുകളിലും വച്ച് വിദ്യാര്‍ഥികള്‍ക്ക് പാമ്പു കടിയേറ്റതായുള്ള റിപ്പോര്‍ട്ടുകളുടെ അടിസ്ഥാനത്തിലാണ് കഴിഞ്ഞ ദിവസം വീണ്ടും ഉത്തരവിറക്കാനിടയായതെന്ന് പൊതു വിദ്യാഭ്യാസ ഡയരക്ടര്‍ പറയുന്നു. നിലവിലെ അധ്യയന വര്‍ഷത്തിലെ തുടര്‍ന്നുള്ള ദിവസങ്ങളില്‍ സുരക്ഷാ നിര്‍ദേശങ്ങള്‍ കര്‍ശനമായി പാലിക്കണമെന്നും ഉത്തരവിലുണ്ട്. ജനല്‍, വാതില്‍, എയര്‍ഹോള്‍, വെന്റിലേറ്റര്‍ എന്നിവ വഴി പാമ്പുകളോ എലികളോ പെരുച്ചാഴികളോ വരാനിടമില്ലാത്ത വിധത്തില്‍ ക്ലാസ് മുറികള്‍ ഭദ്രമാക്കണമെന്നും നിര്‍ദേശത്തിലുണ്ട്.