ഫറോക്ക് : പണമിടപാട് തര്‍ക്കത്തില്‍ യുവാവിനെ തട്ടികൊണ്ടു പോകാന്‍ ശ്രമിച്ച കേസില്‍ ഒരാളെ ഫറോക്ക് പൊലിസ് അറസ്റ്റ് ചെയ്തു. മണ്ണൂര്‍ വടുക്കമ്പാട് ബ്രഹ്മപുത്ര വീട്ടില്‍ സോം മനോഹറി(33)നെയാണ് ഫറോക്ക് എസ്.ഐ അനില്‍കുമാറിന്റെ നേതൃത്വത്തിലുള്ള സംഘം കസ്റ്റഡിയിലെടുത്തത്.
വൈദ്യരങ്ങാടി ശ്രീവിഹാറില്‍ ശ്രീകാന്തി(31)നെയാണ് സോംമനോഹറും സുഹൃത്ത് രാമനാട്ടുകര സ്വദേശി ഷാഹുല്‍ ദാസും ചേര്‍ന്നു തട്ടിക്കൊണ്ടുപോകാന്‍ ശ്രമിച്ചത്. കഴിഞ്ഞ ദിവസം വൈകീട്ട് 5.30ഓടെയാണ് സംഭവം. പണമിടപാട് തര്‍ക്കം പരിഹരിക്കാനാണെന്ന് പറഞ്ഞു സോം മനഹോറാണ് ശ്രീകാന്തിനെ രാമനാട്ടുകരയിലേക്ക് വിളിച്ചു വരുത്തിയത്. ഇവിടെനിന്നു വാഹനത്തില്‍ കയറ്റികൊണ്ടു പോയ ശ്രീകാന്തിനെ ഹൈലൈറ്റ് മാളിനു സമീപത്തെ ബിസിനസ് പാര്‍ക്കിലെത്തിച്ചു ഭീഷണിപ്പെടുത്തി.
ഇതിനിടയില്‍ വിവരമറിഞ്ഞ പൊലിസ് സ്ഥലത്തെത്തി സോം മനോഹറിനെ കസ്റ്റഡിയിലെടുക്കുകയായിരുന്നു. ഓടി രക്ഷപ്പെട്ട ഷാഹുല്‍ ദാസിനു വേണ്ടി അന്വേഷണം ഊര്‍ജിതമാക്കി. ശ്രീകാന്തിന്റെ ഉടമസ്ഥതയിലുള്ള വാഹനം ഷാഹുല്‍ദാസിനു പണയത്തിനു കൊടുത്തിരുന്നു. പണയ സംഖ്യ തിരികെ വാങ്ങിച്ചു വാഹനം മടക്കിതരണമെന്ന് ആവശ്യപ്പെട്ടിട്ടും ഷാഹുല്‍ദാസ് തയാറാകാത്തതാണ് തര്‍ക്കത്തിനു കാരണമെന്നാണ് ശ്രീകാന്ത് പറയുന്നത്.
ഇതുമായി ബന്ധപ്പെട്ട് ശ്രീകാന്ത് പൊലിസില്‍ പരാതി നല്‍കിയിരുന്നു. ഇതിനടിയിലാണ് തട്ടിക്കൊണ്ടുപോകാന്‍ ശ്രമം നടത്തിയത്. അറസ്റ്റ് ചെയ്ത പ്രതിയെ കോടതി റിമാന്‍ഡ് ചെയ്തു.