ചെങ്ങന്നൂര്‍: കൊഴുവല്ലൂര്‍ കോടുകുളഞ്ഞി കരോട് കൃഷ്ണാലയത്തില്‍ മധുവിന്റെ വീടിന് മദ്യലഹരിയിലായിരുന്ന അയല്‍വാസി തീയിട്ടു. ഇതുമായി ബന്ധപ്പെട്ട് അയല്‍വാസിയായ കൊഴുവല്ലൂര്‍ കോടുകുളഞ്ഞി കരോട് പൂമൂട്ടില്‍ കിഴക്കേതില്‍ സന്തോഷിനെ വെണ്മണി പൊലിസ് കസ്റ്റഡിയില്‍ എടുത്തു.
മധുവിന്റെ വീട് വാസയോഗ്യമല്ലാതെ തകര്‍ന്നതിനെ തുടര്‍ന്ന് സര്‍ക്കാര്‍ പുതിയ ഒരു വീട് അനുവദിച്ചിരുന്നു. ഈ വീടിന്റെ നിര്‍മാണം പൂര്‍ത്തിയായി അടുത്ത ദിവസം ഗൃഹപ്രവേശം നടത്താനിരിക്കുന്ന വേളയിലായിരുന്നു അത്യാഹിതം. വെറും താത്കാലിക ഷെഡിലായിരുന്നു മധുവും കുടുംബവും താമസിച്ചിരുന്നത്. ഇന്നലെ വൈകിട്ട് മദ്യപിച്ചെത്തിയ സന്തോഷ് ഇയാളുമായി വാക്കുതര്‍ക്കത്തിലേര്‍പ്പെടുകയും മധുവിനെ മര്‍ദ്ദിക്കുകയും ചെയ്തു. പിന്നീട് താത്കാലിക ഷെഡിന് തീവയ്ക്കുകയായിരുന്നു. വീട് പൂര്‍ണമായും കത്തി നശിച്ചു.