പാരിസ്: പി.എസ്.ജിയില്‍ ഫ്രഞ്ച് സൂപ്പര്‍ താരം കൈലിയന്‍ എംബാപ്പെയും കോച്ചും തമ്മില്‍ ഉടക്ക്. ടീം പരിശീലകന്‍ തോമസ് ടച്ചലും താരവും തമ്മിലുള്ള അസ്വാരസ്യമാണ് എംബാപ്പെയുടെ പിണക്കത്തിന് വഴിയൊരുക്കിയത്. മോന്റ്‌പെല്ലിയറിനെതിരേ ശനിയാഴ്ച നടന്ന മത്സരത്തിനിടെ എംബാപ്പയെ പിന്‍വലിച്ചതിനെത്തുടര്‍ന്നാണ് നാടകീയ സംഭവങ്ങള്‍ അരങ്ങേറിയത്. മത്സരത്തില്‍ പി.എസ്.ജി അഞ്ച് ഗോളിന്റെ വ്യക്തമായ ലീഡുമായി നില്‍ക്കെ 68ാം മിനുട്ടില്‍ എംബാപ്പയെ പിന്‍വലിച്ച് കോച്ച് ഇക്കാര്‍ഡിക്ക് അവസരം നല്‍കുകയായിരുന്നു. ഇതിനെ തുടര്‍ന്ന് താരം കോച്ചുമായി വാക്കേറ്റത്തിലേര്‍പ്പെട്ടു. പിന്നീട് ക്ലബ് അധികൃതര്‍ ഇരുവരെയും വിളിച്ചുവരുത്തി മയപ്പെടുത്തുകയും ചെയ്‌തെന്നാണ് റിപ്പോര്‍ട്ട്. അതേസമയം, കോച്ചിനോട് മാപ്പ് പറയാന്‍ എംബാപ്പെ തയാറിയില്ലെന്നും റിപോര്‍ട്ടില്‍ പറയുന്നു. മുന്‍പും കോച്ച് ടച്ചലും എംബാപ്പെയും തമ്മില്‍ വാക്കേറ്റമുണ്ടായിട്ടുണ്ട്്. മത്സരത്തില്‍ എതിരില്ലാത്ത അഞ്ച് ഗോളിന് പി.എസ്.ജി ജയിച്ചിരുന്നു. ഇതില്‍ ഒരു ഗോള്‍ എംബാപ്പെയുടെ വകയായിരുന്നു.