കല്‍ക്കത്ത: ദോഹയില്‍നിന്നു ബാങ്കോക്കിലേക്കുള്ള യാത്രാമധ്യേ യാത്രക്കാരിലൊരാള്‍ക്കു പ്രസവവേദന അനുഭവപ്പെട്ടതിനെ തുടര്‍ന്നു വിമാനം അടിയന്തരമായി തിരിച്ചിറക്കി. കൊല്‍ക്കത്ത നേതാജി സുഭാഷ് ചന്ദ്രബോസ് ഇന്റര്‍നാഷനല്‍ വിമാനത്താവളത്തിലാണ് ഖത്തര്‍ എയര്‍വേയ്‌സിന്റെ വിമാനം അടിയന്തര ലാന്‍ഡിങ് നടത്തിയത്.
ഇന്നലെ പുലര്‍ച്ചെയായിരുന്ന സംഭവം. 352 യാത്രക്കാരുമായി ദോഹയില്‍നിന്നു പുറപ്പെട്ട ഖത്തര്‍ എയര്‍വേയ്‌സ് വിമാനം നാഗ്പുര്‍ പരിധി കഴിഞ്ഞതോടെ യാത്രക്കാരികളിലൊരാള്‍ക്കു പ്രസവവേദന അനുഭവപ്പെടുകയായിരുന്നു. പുലര്‍ച്ചെ 3.10ന് കൊല്‍ക്കത്തയിലിറങ്ങിയ വിമാനത്തിനുള്ളിലേക്കു മെഡിക്കല്‍ സ്റ്റാഫും സംഘങ്ങളും എത്തിയപ്പോഴേക്കും എയര്‍ഹോസ്റ്റസിന്റെ സഹായത്തോടെ യുവതി പ്രസവിച്ചിരുന്നു. എമിഗ്രേഷന്‍ നടപടികള്‍ക്കു ശേഷം യുവതിയെ കൊല്‍ക്കത്തയിലെ സ്വകാര്യ ആശുപത്രിയിലേക്കു കൊണ്ടുപോകുകയും ചെയ്തു. അമ്മയും കുഞ്ഞും സുഖമായിരിക്കുന്നുവെന്ന് ആശുപത്രി അധികൃതര്‍ അറിയിച്ചു. എമര്‍ജന്‍സി ലാന്‍ഡിങ് നടത്തിയ വിമാനം രാവിലെ 5.50ന് യാത്ര തുടര്‍ന്നു.