നെയ്പിഡോ: റോഹിംഗ്യരെ വംശഹത്യാ നടപടികളില്‍നിന്നു സംരക്ഷിക്കാന്‍ അടിയന്തര നടപടി സ്വീകരിക്കണമെന്ന അന്താരാഷ്ട്ര നീതി ന്യായ കോടതിയുടെ നിര്‍ദേശം അവഗണിച്ച് മ്യാന്‍മറിന്റെ ക്രൂരത തുടരുന്നു. റാഖൈന്‍, ചിന്‍ സംസ്ഥാനങ്ങളിലെ ഇന്റര്‍നെറ്റ് വിലക്ക് മ്യാന്‍മര്‍ ഭരണകൂടം പുനഃസ്ഥാപിച്ചു.
സാമാധാന ചര്‍ച്ചകളുടെ ഭാഗമായി അഞ്ചു മാസം മുന്‍പു നീക്കിയ വിലക്കാണ് പുനഃസ്ഥാപിച്ചിരിക്കുന്നത്. കഴിഞ്ഞയാഴ്ച റാഖൈ നില്‍ സൈന്യം നടത്തിയ വെടിവയ്പില്‍ രണ്ടു റോഹിംഗ്യന്‍ സ്ത്രീകള്‍ കൊല്ലപ്പെടുകയും ഏഴുപേര്‍ക്കു പരുക്കേല്‍ക്കുകയും ചെയ്തിരുന്നു. ഇതിനു പിന്നാലെയാണ് സൈന്യത്തിന്റെ പുതിയ ഉപരോധം. റോഹിംഗ്യകള്‍ക്കെതിരായ വംശഹത്യാ നടപടികള്‍ തടയാന്‍ സര്‍ക്കാര്‍ അടിയന്തര നടപടി സ്വീകരിക്കണമെന്ന് അന്താരാഷ്ട്ര ക്രിമിനല്‍ കോടതി ആവശ്യപ്പെട്ട് രണ്ടു ദിവസം കഴിഞ്ഞായിരുന്നു സംഭവം.
റാഖൈന്‍, ചിന്‍ സംസ്ഥാനങ്ങളിലെ അഞ്ചു ടൗണ്‍ഷിപ്പുകളില്‍ മൂന്നു മാസത്തേക്ക് ഇന്റര്‍നെറ്റിന് വിലക്കേര്‍പ്പെടുത്താന്‍ വിവരസാങ്കേതിക മന്ത്രാലയം അറിയിച്ചതായി നോര്‍വീജിയന്‍ മൊബൈല്‍ കമ്പനി അറിയിച്ചു. എന്നാല്‍, ഇത്തരം ഒരു നീക്കത്തെക്കുറിച്ച് അറിയില്ലെന്നായിരുന്നു സൈനിക വക്താവിന്റെ പ്രതികരണം.