പി.ആര്‍ രാജേഷ്

ആലക്കോട്: വിനോദസഞ്ചാരികള്‍ക്ക് ദൃശ്യവിരുന്നൊരുക്കി ഉദയഗിരി പഞ്ചായത്തിലെ തിരുനെറ്റിക്കല്ല്. കര്‍ണാടക വനാതിര്‍ത്തിയോടു ചേര്‍ന്നുകിടക്കുന്ന തിരുനെറ്റിക്കല്ലില്‍ ദൃശ്യമാകുന്നതു പൈതല്‍മലയിലെയും പാലക്കയംതട്ടിലെയും സമാനരീതിയിലുള്ള പ്രകൃതിരമണീയ കാഴ്ചകളാണ്. ജില്ലയുടെ വിവിധ ഭാഗങ്ങളില്‍ നിന്നു നിരവധി സഞ്ചാരികളാണു ദിനംപ്രതി ഇവിടെ എത്തുന്നത്. സമുദ്രനിരപ്പില്‍ നിന്നു മൂവായിരത്തിലധികം അടി ഉയരത്തില്‍ സ്ഥിതിചെയ്യുന്ന തിരുനെറ്റിക്കല്ലില്‍ നിന്നാല്‍ നിരവധി മലമടക്കുകളും കര്‍ണാടകവനത്തിലെ പതിനായിരക്കണക്കിന് ഏക്കറില്‍ പരന്നുകിടക്കുന്ന പച്ചപ്പരവതാനി കണക്കെയുള്ള മലനിരകളും കാണാം. തിരുനെറ്റിമലയില്‍ ഉയര്‍ന്നുനില്‍ക്കുന്ന രണ്ടു പാറകളാണു തിരുനെറ്റിക്കല്ലിന് ആ പേരു നല്‍കിയത്. പത്തുമീറ്റര്‍ ഉയരമുള്ള പാറയുടെ മുകളില്‍ സാഹസികമായി കയറി ദൃശ്യങ്ങള്‍ കാണുന്നവരുമുണ്ട്. ഇവിടെ സ്ഥാപിച്ചിരിക്കുന്ന കുരിശു വണങ്ങാനും പ്രാര്‍ഥിക്കാനും നിരവധി ഭക്തരും എത്തുന്നുണ്ട്. ദുഃഖവെള്ളിയാഴ്ച ഇവിടെ മലകയറ്റവുമുണ്ട്. കര്‍ണാടകയിലെ പ്രധാന തീര്‍ഥാടനകേന്ദ്രമായ തലക്കാവേരി ക്ഷേത്രവും ഇവിടെ നിന്നു കാണാം. സൂര്യോദയത്തില്‍ മഞ്ഞണിഞ്ഞ മലകളും വൈകുന്നേരത്തെ അസ്തമയ സൂര്യന്റെ പൊന്‍കിരണങ്ങളും മനോഹര കാഴ്ചകളാകുന്നു.
തളിപ്പറമ്പില്‍ നിന്നു 40 കിലോമീറ്റര്‍ സഞ്ചരിച്ചാല്‍ ഈ വിനോദസഞ്ചാര കേന്ദ്രത്തിലെത്താം.അതേസമയം വിനോദസഞ്ചാരികള്‍ക്ക് ആവശ്യമായ സൗകര്യങ്ങള്‍ ഒരുക്കണമെന്ന ആവശ്യം ശക്തമായി.