കണ്ണൂര്‍: ഇന്ന് ലഭ്യമാകുന്ന കുപ്പിവെള്ളത്തെ കുറിച്ച് ആശങ്കയും പരാതിയും നിലനില്‍ക്കുന്ന സാഹചര്യത്തില്‍ വെള്ളത്തിന്റെ ശുദ്ധി ഉറപ്പുവരുത്തുന്നതിനായി കൂടുതല്‍ പരിശോധനാ നടപടികള്‍ ആരംഭിക്കുമെന്നും നിലവിലുള്ള പരിശോധനാ സംവിധാനങ്ങള്‍ പര്യാപ്തമല്ലെന്നാണ് പരാതികളില്‍നിന്ന് വ്യക്തമാകുന്നതെന്നും മന്ത്രി ഇ.പി ജയരാജന്‍. കൂടാളി പഞ്ചായത്ത് പ്രാഥമികാരോഗ്യ കേന്ദ്രത്തിന്റെ ഒന്നാം നിലയുടെയും പുതുതായി നിര്‍മിച്ച ലാബിന്റെയും ഉദ്ഘാടനം നിര്‍വഹിക്കുകയായിരുന്നു മന്ത്രി. വെള്ളം ശുദ്ധീകരിച്ചാണു ഇന്ന് വീടുകളിലും മറ്റും ഉപയോഗിക്കുന്നത്. ഇതിനുള്ള സംവിധാനങ്ങള്‍ മാര്‍ക്കറ്റില്‍ ഇന്നു ലഭ്യമാണ്. ഇവയുടെ കമ്പനികള്‍ക്ക് ലാഭത്തോടുള്ള ആര്‍ത്തി കൂടിവരുന്നതിനാല്‍ മാര്‍ക്കറ്റ് ചെയ്യപ്പെടുമ്പോള്‍ ഗുണനിലവാരത്തില്‍ കുറവുണ്ടാകുന്നുണ്ടെന്നും മന്ത്രി പറഞ്ഞു. നിരവധി പുതിയതരം രോഗങ്ങളാണ് ഇന്നുണ്ടാകുന്നത്. ഇത്തരം രോഗങ്ങള്‍ കൃത്യമായി നിര്‍ണയിക്കാന്‍ കഴിയണമെങ്കില്‍ കൂടുതല്‍ ശാസ്ത്രീയമായ പരീക്ഷണം ആവശ്യമാണ്. കൃത്യമായ രോഗ നിര്‍ണയത്തിലൂടെ മാത്രമേ കൃത്യമായ ചികിത്സ ലഭ്യമാക്കാന്‍ സാധിക്കു. മട്ടന്നൂരില്‍ സൂപ്പര്‍ സ്‌പെഷാലിറ്റി സ്ഥാപിക്കുന്നതിന് ഇറിഗേഷന്റെ ഭാഗത്തുനിന്ന് മൂന്ന് ഏക്കര്‍ സ്ഥലം വാങ്ങുകയും ധനകാര്യ വകുപ്പില്‍നിന്ന് സഹായം ആവശ്യപ്പെടുകയും ചെയ്തിട്ടുണ്ട്. ആരോഗ്യ രംഗത്താണ് സര്‍ക്കാര്‍ ഏറ്റവും കൂടുതല്‍ പണം ചെലവഴിക്കുന്നത്. ആരോഗ്യപൂര്‍ണമായ കേരളമാണ് സര്‍ക്കാരിന്റെ ലക്ഷ്യം. സര്‍ക്കാര്‍ ആരംഭിക്കുന്ന ഓരോ പദ്ധതിയുടെയും വിജയത്തിന്റെ അടിസ്ഥാനം തദ്ദേശ സ്വയംഭരണ സ്ഥാപനങ്ങളുടെ പ്രവര്‍ത്തനമാണെന്നും അദ്ദേഹം വ്യക്തമാക്കി. സ്പര്‍ശം പദ്ധതിയുടെ ഉദ്ഘാടനവും മന്ത്രി നിര്‍വഹിച്ചു. പാലിയേറ്റീവ് പദ്ധതിയില്‍ ഉള്‍പ്പെട്ട കുടുംബങ്ങളിലെ സാമ്പത്തികമായി പിന്നോട്ട് നില്‍ക്കുന്നവര്‍ക്ക് എല്ലാ മാസവും പ്രോട്ടീന്‍ കിറ്റുകള്‍ വിതരണം ചെയ്യുന്നതാണ് പദ്ധതി. 50 കുടുംബങ്ങള്‍ക്കാണ് നിലവില്‍ കിറ്റുകള്‍ വിതരണം ചെയ്യുന്നത്.