കൊണ്ടോട്ടി: ദക്ഷിണേന്ത്യന്‍ ശാസ്ത്രമേളയില്‍ കേരളത്തിന് അഭിമാനമായി കൊട്ടുക്കര പി.പി.എം.എച്ച്.എസ് സ്‌കൂളിലെ കെ. ലാമിയ ഷെറിന്‍. കഴിഞ്ഞ ഏഴു മുതല്‍ 11 വരെ ബംഗളൂരു സെന്റ് ജോസഫ് ഇന്ത്യന്‍ ഹൈസ്‌കൂള്‍ കാംപസില്‍ നടന്ന മേളയില്‍ കേരളത്തെ പ്രതിനിധീകരിച്ച് പങ്കെടുത്ത സ്‌കൂളിലെ ലാമിയ ഷെറിന് ഹൈസ്‌കൂള്‍ സയന്‍സ് ഇംപ്രൊവൈസ്ഡ് എക്‌സ്‌പെരിമെന്റല്‍ പ്രോജക്ടിന് വ്യക്തിഗത ഇനത്തില്‍ രണ്ടാം സ്ഥാനം ലഭിച്ചു.
കേരളം, തമിഴ്‌നാട്, ആന്ധ്രപ്രദേശ്, തെലങ്കാന, പോണ്ടിച്ചേരി എന്നിവിടങ്ങളിലെ ഹൈസ്‌കൂള്‍ ശാസ്ത്ര പ്രതിഭകളുടെ മുന്നൂറോളം ശാസ്ത്ര മോഡലുകളാണ് മേളയിലെ മത്സരങ്ങളില്‍ അവതരിപ്പിച്ചത്. ഭൗതിക ശാസ്ത്രത്തിലെ പ്രതലബലം, പാസ്‌കല്‍ നിയമം, ദ്രാവക മര്‍ദം, ആര്‍ക്കിമിഡീസ് തത്വം, വിസ്‌കോസിറ്റി എന്നീ ആശയങ്ങളുമായി ബന്ധപ്പെട്ട് ക്ലാസ് റൂം പഠനം എളുപ്പമാക്കുന്ന പുതുമയുള്ള പരീക്ഷണങ്ങളാണ് ലാമിയ ഷെറിന്‍ അവതരിപ്പിച്ചത്.
മേളയില്‍ വിധികര്‍ത്താക്കളുടെയും ശാസ്ത്രജ്ഞരുടെയും ശാസ്ത്രാധ്യാപക വിദ്യാര്‍ഥികളുടെയും പ്രത്യേകം അഭിനന്ദനവും അംഗീകാരവും നേടിയെടുക്കാന്‍ പ്രോജക്ടിന് സാധിച്ചു. അധ്യാപകന്‍ ടി. ഫസലുല്ലയുടെ മേല്‍നോട്ടത്തിലാണ് പ്രോജക്ട് തയാറാക്കിയത്.നേട്ടം കൈവരിച്ച ഷെറിനെ പി.ടി.എ, മാനേജര്‍, പ്രിന്‍സിപ്പല്‍, പ്രഥമാധ്യാപകന്‍ എന്നിവര്‍ അഭിനന്ദിച്ചു.