കൊച്ചി:അന്ത്യോദയ ട്രെയിന്‍ എറണാകുളത്തിനും ഹൗറയ്ക്കുമിടയില്‍ സര്‍വിസ് ആരംഭിച്ചു. എറണാകുളം സൗത്ത് റെയില്‍വേസ്‌റ്റേഷനില്‍ നടന്ന ചടങ്ങ് കേന്ദ്രമന്ത്രി സുരേഷ് പ്രഭു വിഡിയോ കോണ്‍ഫറന്‍സ് വഴി ഉദ്ഘാടനം ചെയ്തു.
ഇന്ത്യല്‍ റെയില്‍വേയുടെ ആദ്യ അന്ത്യോദയ ട്രെയിന്‍ സര്‍വിസാണിത്. പുതിയ കേറ്ററിങ് നയവും കേന്ദ്രമന്ത്രി പ്രഖ്യാപിച്ചു.
കേറ്ററിങ് നയം വരുന്നതോടെ ഗുണനിലവാരമുള്ള ഭക്ഷണം യാത്രക്കാര്‍ക്കു ലഭിക്കുമെന്നു ഉറപ്പാക്കാന്‍ കഴിയും. ഭക്ഷണ സാധനങ്ങള്‍ തയാറാക്കുന്നതില്‍ മേല്‍നോട്ടമില്ലാത്തതാണു ഇപ്പോഴത്തെ പ്രശ്‌നങ്ങള്‍ക്കു കാരണം. ബേസ് കിച്ചണുകളില്‍ യന്ത്രസംവിധാനങ്ങളുടെ സഹായത്തോടെയാകും ഇനി ഭക്ഷണം തയാറാക്കി വിതരണം ചെയ്യുക.
സ്ത്രീകളുടെ സ്വയം സഹായ സംഘങ്ങളെ ഭക്ഷണ വിതരണത്തില്‍ പങ്കാളികളാക്കും. ബേസ് കിച്ചണ്‍ വരുന്നതോടെ ഈ മേഖലയില്‍ മുന്‍പരിചയമുള്ള കേറ്ററിങ് ഗ്രൂപ്പുകളെ കൊണ്ടു വരാന്‍ കഴിയുമെന്നും അദ്ദേഹം പറഞ്ഞു.
റെയില്‍വേ പദ്ധതികള്‍ നടപ്പാക്കാന്‍ കേരളവുമായി കരാര്‍ ഒപ്പു വച്ചതിനാല്‍ കൂടുതല്‍ പദ്ധതികള്‍ കേരളത്തിനു ലഭിക്കും. കേരളത്തിനു ഒന്നും ലഭിക്കുന്നില്ലെന്ന പരാതി പരിഹരിക്കപ്പെടുമെന്നും അദ്ദേഹം പറഞ്ഞു. വേഗത കൂടിയ തേജസ്, ഡബിള്‍ഡക്കര്‍ ഉദയ് ട്രെയിനുകളുടെ സര്‍വിസ് റെയില്‍വേ ഉടന്‍ ആരംഭിക്കുമെന്നും സുരേഷ് പ്രഭു പറഞ്ഞു.
നഗരസഭ ഡപ്യൂട്ടി മേയര്‍ ടി.ജെ വിനോദ്, ഡിവിഷനല്‍ റെയില്‍വേ മാനേജര്‍ പ്രകാശ് ഭൂട്ടാനി, ഡിവിഷനല്‍ എന്‍ജീനീയര്‍ രാജേന്ദ്ര കുമാര്‍ മീണ, സീനിയര്‍ ഡിവിഷനല്‍ സിഗ്‌നല്‍ ആന്‍ഡ് ടെലി കമ്യൂണിക്കേഷന്‍ എന്‍ജിനീയര്‍ പ്രേംചന്ദ് ഹരിജന്‍, ഏരിയ മാനേജര്‍ ആര്‍ ഹരികൃഷ്ണന്‍, സ്റ്റേഷന്‍ മാനേജര്‍ രോഹിത് ചന്ദ്രന്‍ തുടങ്ങിയവര്‍ സംസാരിച്ചു.