കഴക്കൂട്ടം: വിവാഹ വാഗ്ദാനം നല്‍കി 15 കാരിയായ സ്‌കൂള്‍ വിദ്യാര്‍ഥിനിയെ ലൈംഗികമായി പീഡിപ്പിച്ച കേസില്‍ യുവാവ് പോക്‌സോ നിയമപ്രകാരം അറസ്റ്റില്‍.
പേട്ട ചായക്കുടി ലൈനില്‍ ഒട്ടാലി ഹൗസില്‍ ജയേഷ് (25) ആണ് തുമ്പ പൊലിസിന്റെ പിടിയിലായത്. കഴിഞ്ഞ ദിവസം ആളൊഴിഞ്ഞ പ്രദേശത്ത് പെണ്‍കുട്ടിയേയും യുവാവിനെയും ദുരൂഹ സാഹചര്യത്തില്‍ കണ്ട നാട്ടുകാര്‍ പൊലിസില്‍ വിവരമറിയിച്ചതിനെ തുടര്‍ന്ന് സ്ഥലത്തെത്തിയ തുമ്പ പൊലിസാണ് യുവാവിനെ കസ്റ്റഡിയിലെടുത്തത്. വിവാഹ വാഗ്ദാനം നല്‍കി സ്‌കൂള്‍ വിദ്യാര്‍ഥിനിയെ വിവിധ സ്ഥലങ്ങളിലെത്തിച്ചു പീഡിപ്പിച്ചതായി ജയേഷ് പൊലിസിനോടു പറഞ്ഞു. ട്യൂഷനെന്നും മറ്റും പറഞ്ഞാണ് പെണ്‍കുട്ടി വീട്ടില്‍ നിന്നും പോയിരുന്നത്.  തിരുവനന്തപുരത്ത് വിവിധ സ്ഥലങ്ങളിലെത്തിച്ചാണ് പീഡനം നടത്തിയത്. ഗര്‍ഭധാരണം നടക്കാതിരിക്കാനായി പെണ്‍കുട്ടിക്ക് ഗുളികകളും വാങ്ങി നല്‍കിയിരുന്നു. പ്രതിയ്‌ക്കെതിരേ പോക്‌സോ നിയമ പ്രകാരവും, പീഡനത്തിനും കേസ് രജിസ്റ്റര്‍ ചെയ്തു. തിരുവനന്തപുരം പോക്‌സോ കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു തുമ്പ സ്റ്റേഷന്‍ എസ്.ഐ ഹേമന്ത് കുമാര്‍, എ.എസ് ഐമാരാരായ ശ്യാം രാജ്, കുമാരന്‍, വനിതാ എസ്.ഐ ഷൈല. ഇ.സി.പി.ഒ ബിജു, വനിതാ പൊലിസുകാരായ ശരണ്യ, ജാസ്മിന്‍ എന്നിവരുടെ നേതൃത്വത്തിലായിരുന്നു പ്രതിയെ പിടികൂടിയത്.