യു.പി: പൗരത്വഭേദഗതി നിയമത്തിനെതിരായ പ്രക്ഷോഭ സമരങ്ങള്‍ രാജ്യമൊട്ടാകെ നടന്നുകൊണ്ടിരിക്കേ പരസ്യമായി പൗരത്വം തെളിയിക്കാനാവശ്യപ്പെട്ട് സര്‍വകലാശാല. ഉത്തര്‍ പ്രദേശിലെ ലഖ്‌നൗ സര്‍വകലാശാല അധികൃതരാണ് വിവാരാവകാശ നിയമപ്രകാരം അപേക്ഷ നല്‍കിയ വ്യക്തിയോട് പൗരത്വം തെളിയിക്കാന്‍ ആവശ്യപ്പെട്ടത്.

സര്‍വകലാശാലയിലെ നിയമനങ്ങളുമായി ബന്ധപ്പെട്ടാണ് അലോക് ചാനിത്യ കഴിഞ്ഞ ഡിസംബര്‍ 17ന് വിവരാവകാശ അപേക്ഷ നല്‍കിയത്. എന്നാല്‍ കഴിഞ്ഞ ജനുവരി ഒന്നിന് സര്‍വകലാശാല അധികൃതര്‍ തനിക്ക് നല്‍കിയ മറുപടി കത്തില്‍ താങ്കള്‍ ഇന്ത്യന്‍ പൗരനാണെന്ന് കാണിക്കുന്ന രേഖ ഹാജരാക്കണമെന്നും എന്നാല്‍ മാത്രമേ വിവരങ്ങള്‍ കൈമാറാനാകൂ എന്നും ആവശ്യപ്പെട്ടതായി അലോക് പറഞ്ഞു.

ഇതുസംബന്ധിച്ച് താന്‍ പ്രധാനമന്ത്രിക്കും നിയമമന്ത്രിക്കും പരാതി നല്‍കിയതായും പരാതിയില്‍ ഉചിതമായ നടപടി സ്വീകരിക്കുമെന്നാണ് കരുതുന്നതെന്നും ഇയാള്‍ പറഞ്ഞു. സര്‍വകലാശാല അധികൃതര്‍ക്കെതിരേ രൂക്ഷമായ വിമര്‍ശനം നടത്തിയ അലോക് വിവരാവകാശ നിയമത്തെ അട്ടിമറിക്കുന്ന നിലപാടാണ് അവര്‍ എടുത്തതെന്ന് കുറ്റപ്പെടുത്തി. തന്റെ ജീവിതത്തിന്റെ ഏറിയ പങ്കും സര്‍വകലാശാലയുമായി ബന്ധപ്പെട്ടായിരുന്നു. ആ തന്നെ മനപൂര്‍വം അപമാനിക്കുന്ന നടപടിയാണ് അധികൃതര്‍ ചെയ്തതെന്നം അലോക് കൂട്ടിച്ചേര്‍ത്തു.