തിരുവനന്തപുരം: ഗവര്‍ണറുടെ നയപ്രഖ്യാപനത്തിനുള്ള നന്ദിപ്രമേയം നിയമസഭ പാസാക്കി. മൂന്നു ദിവസത്തെ ചര്‍ച്ചയ്ക്ക് മുഖ്യമന്ത്രി പിണറായി വിജയന്‍ മറുപടി പറഞ്ഞു.
എസ്. ശര്‍മ്മയാണ് നന്ദിപ്രമേയം അവതരിപ്പിച്ചത്. പൗരത്വ നിയമ ഭേദഗതിക്കെതിരേ നിയമസഭ പാസാക്കിയ പ്രമേയത്തില്‍ ഇടപെടാന്‍ ഗവര്‍ണര്‍ക്ക് അധികാരമില്ലെന്ന് നന്ദിപ്രമേയത്തില്‍ ചേര്‍ക്കണമെന്ന കെ.സി ജോസഫിന്റെ ഭേദഗിതി നിര്‍ദേശം സഭ വോട്ടിനിട്ടു തള്ളി.
കിഫ്ബി വഴി ഇതുവരെ 54,391.4 കോടി രൂപയുടെ 679 പദ്ധതികള്‍ക്ക് അംഗീകാരം നല്‍കിക്കഴിഞ്ഞുവെന്ന് മുഖ്യമന്ത്രി മറുപടി പ്രസംഗത്തില്‍ പറഞ്ഞു. അഞ്ചു വര്‍ഷം കൊണ്ട് 50,000 കോടി രൂപയുടെ പദ്ധതി കിഫ്ബി വഴി നടപ്പിലാക്കാനാണ് സര്‍ക്കാര്‍ തീരുമാനിച്ചിരുന്നത്. ഇതുവരെ 4,587 കോടി രൂപ ചെലവഴിച്ചിട്ടുമുണ്ട്.
32 സ്‌കൂളുകള്‍, 39 ഡയാലിസിസ് സെന്ററുകള്‍, നാലു കാത്ത് ലാബുകള്‍, മൂന്ന് ക്രിട്ടിക്കല്‍ കെയര്‍ യൂണിറ്റുകള്‍, ആറു കുടിവെള്ള പദ്ധതികള്‍, ഏഴു റോഡുകള്‍, എട്ടിടങ്ങളില്‍ സോളാര്‍ ഫെന്‍സിങ് തുടങ്ങിയ പദ്ധതികള്‍ കിഫ്ബി മുഖേന പൂര്‍ത്തിയാക്കിയിട്ടുണ്ട്. 13,591 കോടി രൂപയുടെ 347 പദ്ധതികളുടെ ടെന്‍ഡര്‍ നടപടികള്‍ പൂര്‍ത്തീകരിച്ചു.
നാളിതുവരെയുണ്ടാകാത്ത വികസന മുന്നേറ്റമാണ് ഇതിലൂടെ ഉണ്ടായിരിക്കുന്നത്. കിഫ്ബിക്കെതിരായി പ്രതിപക്ഷം വിമര്‍ശനം ഉന്നയിക്കുന്നത് ശരിയല്ലെന്നും മുഖ്യമന്ത്രി പറഞ്ഞു.