ഗുരുവായൂര്‍: നഗരസഭ ഓഫിസില്‍ വിവിധങ്ങളായ ആവശ്യങ്ങള്‍ക്കെത്തുന്ന വികലാംഗര്‍ക്കും വയോധികര്‍ക്കും ഉപയോഗിക്കാനായി റാംപ് വേ ഒരുക്കണമെന്ന ആവശ്യം ഒടുവില്‍ അധികൃതര്‍ നടപ്പാക്കുന്നു. വികലാംഗര്‍ക്കും വയോധികര്‍ക്കും നഗരസഭ ഓഫിസിലെ ചവിട്ടുപടി കയറാനുള്ള ബുദ്ധിമുട്ട് പരിഹരിക്കാനാണ് ഒരു മീറ്ററിലേറെ വീതിയുള്ള റാംപ് വേ നിര്‍മിക്കുന്നത്.
പെന്‍ഷന്‍ കാര്യങ്ങള്‍ പോലുള്ള അന്വേഷണങ്ങള്‍ക്ക് നഗരസഭ ഓഫിസിലെത്തുന്ന വികലാംഗര്‍ക്കും വയോധികര്‍ക്കും ചവിട്ടുപടികള്‍ കയറാനുളള ബുദ്ധിമുട്ട് റാംപ് വേ നിര്‍മാണത്തോടെ ഒഴിവാക്കാനാവും. ഹാന്റ് റെയിലോടു കൂടിയാണ് റാംപ് വേ നിര്‍മിക്കുന്നത്. ട
സ്വകാര്യ ഹോട്ടല്‍, ലോഡ്ജ്, ഷോപ്പിങ്ങ് കോംപ്ലക്‌സുകള്‍, ഫ്‌ളാറ്റുകള്‍ തുടങ്ങിയ നിര്‍മിക്കുമ്പോള്‍ വികലാംഗര്‍ക്കായി റാംപ് വേയും ടോയ്‌ലറ്റും നിര്‍മിക്കണമെന്ന് നിഷ്‌കര്‍ഷിക്കുന്നുണ്ട്. ഇത്തരം കെട്ടിടങ്ങളില്‍ ഈ വക സൗകര്യങ്ങള്‍ ഒരുക്കിയാലെ നഗരസഭാ കെട്ടിടത്തിന് നമ്പരിട്ട് നല്‍കാറുള്ളു. എന്നാല്‍ നഗരസഭ മെയിന്‍ ഓഫിസ്, സോണല്‍ ഓഫിസുകള്‍, നഗരസഭയുടെ ഉടമസ്ഥതയിലുള്ള റെസ്റ്റ് ഹനസുകള്‍, ടൗണ്‍ ഹാള്‍ തുടങ്ങിയവകളില്‍ ഇത്തരം സൗകര്യങ്ങളില്ലാതെയാണ് നഗരസഭ സ്വകാര്യ കെട്ടിടങ്ങളില്‍ ഇത്തരം സൗകര്യങ്ങളൊരുക്കാന്‍ ആവശ്യപ്പെട്ടു വരുന്നത്.
ഗുരുവായൂര്‍ നഗരസഭയുടെ കെട്ടിടങ്ങളില്‍ വികലാംഗര്‍ക്ക് റാംപ് വേയും ടോയ്‌ലറ്റുകളും ഒരുക്കണമെന്നാവശ്യപ്പെട്ട് ഗുരുവായൂര്‍ ചാമുണ്ഡേശ്വരി സൈമണ്‍ (മടക്കാവില്‍ സൈമണ്‍) എന്നയാള്‍ തദ്ദേശ വകുപ്പ് സെക്രട്ടറിയോട് പരാതിപ്പെട്ടിരുന്നു. ഇതേ തുടര്‍ന്നാണ് നഗരസഭ മെയിന്‍ ഓഫിസില്‍ റാംപ് വേ നിര്‍മിക്കുന്നത്.