ലഖ്‌നോ: 63-ാം ജന്മദിനത്തില്‍, തന്റെ പാര്‍ട്ടിക്ക് വമ്പിച്ച വിജയം സമ്മാനിക്കുമെന്ന പ്രഖ്യാപനം നടത്തി ബി.എസ്.പി നേതാവ് മായാവതി. ഇന്ത്യയിലെ ഏറ്റവും വലിയ സംസ്ഥാനമായ യു.പി ആയിരിക്കും ആരു പ്രധാനമന്ത്രിയാവണമെന്ന് തീരുമാനിക്കുകയെന്നും അവര്‍ പറഞ്ഞു.

'ആര് പ്രധാനമന്ത്രിയാവണമെന്ന് യു.പി തീരുമാനിക്കും. ബി.എസ്.പിയും എസ്.പിയും ഒന്നിച്ചുമത്സരിക്കണം. രണ്ടാള്‍ക്കുമിടയിലുള്ള ഭിന്നതകള്‍ മാറ്റിവച്ച് എല്ലാ സഖ്യ സ്ഥാനാര്‍ഥികള്‍ക്കും വിജയിക്കാനാവണം. ഇതായിരിക്കും എനിക്കുള്ള ഏറ്റവും വലിയ ജന്മദിന സമ്മാനം'- മായാവതി പറഞ്ഞു.

എസ്.പി- ബി.എസ്.പി സഖ്യമുണ്ടായതിനു പിന്നാലെ പ്രധാനമന്ത്രിയെപ്പറ്റി ചര്‍ച്ചകള്‍ ഉയരുന്നുണ്ട്. യു.പിയില്‍ നിന്നു തന്നെ പ്രധാനമന്ത്രിയുണ്ടാവണമെന്ന തരത്തിലാണ് എസ്.പി നേതാവ് അഖിലേഷ് യാദവും പ്രതികരിച്ചത്.

'യു.പി നിരവധി പ്രധാനമന്ത്രിമാരെ നല്‍കിയിട്ടുണ്ട്. നിങ്ങള്‍ക്കറിയാം ഞങ്ങള്‍ ആരെ പിന്തുണയ്ക്കണമെന്ന്. ഒരു പ്രധാനമന്ത്രി കൂടി യു.പിയില്‍ നിന്ന് ഉണ്ടാവുന്നതില്‍ ഞാന്‍ സന്തുഷ്ടനാണ്'- അഖിലേഷ് യാദവ് പറഞ്ഞു.