കുമ്പള: പൂകട്ടകുമ്പള-കളത്തൂര്‍ റൂട്ടില്‍ ഇടക്കിടെ ട്രിപ്പ് മുടക്കി സര്‍വീസ് നടത്തുന്ന സ്വകാര്യ ബങുകളെ നാട്ടുകാര്‍ തടഞ്ഞു. കഴിഞ്ഞ ദിവസം വൈകുന്നേരം അഞ്ചുമണിയോടെയാണ് സംഘടിച്ചെത്തിയ നാട്ടുകാര്‍ പുകട്ട ജങ്ഷനില്‍ ബസുകള്‍ തടഞ്ഞിട്ടത്. കുമ്പള പൊലിസെത്തിയാണ് പരിഹരിച്ചത്. ട്രിപ്പു മുടക്കുന്ന ബസുകള്‍ക്കെതിരേ കര്‍ശനനടപടിയുണ്ടാകുമെന്ന ഉറപ്പിലാണ് നാട്ടുകാര്‍ പിരിഞ്ഞുപോയത്.
പുകട്ട-കുമ്പള-കളത്തൂര്‍ റൂട്ടില്‍ പത്തോളം ബസുകള്‍ സര്‍വീസ് നടത്തുന്നുണ്ട്. 15മിനുട്ട് ഇടവിട്ടു സര്‍വീസ് നടത്തുന്ന ബസുകള്‍ മിക്ക സമയത്തും ട്രിപ്പ് മുടക്കുന്നതായാണ് പരാതി. നിരവധി തവണ ബസ്ജീവനക്കാരോടും ആര്‍.ടി.ഒക്കും പരാതി നല്‍കിയിട്ടും ഫലമില്ലാത്തതിനെ തുടര്‍ന്നാണ് കഴിഞ്ഞ ദിവസം നാട്ടുകാര്‍ ബസുകള്‍ തടഞ്ഞിട്ടത്.
ട്രിപ്പ് തോന്നുന്നതുപോലെ നടത്തുന്നതിനു പുറമെ വിദ്യാര്‍ഥികളെ ബസില്‍ കയറ്റുന്നില്ലെന്നും സ്റ്റോപ്പില്‍ നിര്‍ത്തുന്നില്ലെന്നും നാട്ടുകാര്‍ പറയുന്നു.