ബഹ്‌റൈന്‍: ഇന്ത്യന്‍ ടീം ഏഷ്യന്‍ കപ്പില്‍നിന്ന് പുറത്തായതിന് പിന്നാലെ പരിശീലകന്‍ സ്റ്റീഫന്‍ കോണ്‍സ്റ്റന്റൈന്‍ രാജിവച്ചു. കോണ്‍സ്റ്റന്റൈനിന്റെ കീഴിലിറങ്ങിയ ഇന്ത്യ ഏഷ്യന്‍ കപ്പില്‍ മികച്ച പ്രകടനം കാഴ്ചവച്ചെങ്കിലും പ്രീ ക്വാര്‍ട്ടറില്‍ കടക്കാന്‍ കഴിഞ്ഞില്ല. ഈ മാസം അവസാനം വരെ കരാറുണ്ടായിരുന്ന കോണ്‍സ്റ്റന്റൈന്‍ ബഹ്‌റൈനോടേറ്റ അപ്രതീക്ഷിത തോല്‍വിയില്‍ നിരാശനായാണ് സ്ഥാനം ഒഴിഞ്ഞത്. ബഹ്‌റൈനെതിരേയുള്ള അവസാന മത്സരത്തില്‍ പ്രീ ക്വാര്‍ട്ടറിലേക്ക് സമനില മാത്രം മതിയായിരുന്ന ഇന്ത്യ 91 ാം മിനുട്ടില്‍ ജമാല്‍ റാഷിദിന്റെ പെനാല്‍റ്റി ഗോളില്‍ പരാജയപ്പെട്ടാണ് ഏഷ്യന്‍ കപ്പില്‍ നിന്ന് പുറത്തായത്.
വിം കോമര്‍മാന് പകരം 2014 ഡിസംബറിലായിരുന്നു ഇന്ത്യന്‍ ടീമിന്റെ പരിശീലകനായി കോണ്‍സ്റ്റന്റൈന്‍ എത്തിയത്. അന്ന് 173ാം റാങ്കിലുണ്ടായിരുന്ന ഇന്ത്യയെ 97ാം റാങ്കിലെത്തിച്ചതിന് ശേഷമാണ് കോണ്‍സ്റ്റന്റൈനിന്റെ പടിയിറക്കം. ഒരുപാട് യുവതാരങ്ങള്‍ക്ക് അവസരം നല്‍കുന്ന അദ്ദേഹത്തിന്റെ ടീം സെലക്ഷന്‍ ഒരുപാട് വിമര്‍ശനങ്ങള്‍ക്ക് ഇടവരുത്തിയിരുന്നു. എന്നാല്‍, ഇന്ത്യന്‍ ഫുട്‌ബോള്‍ ടീമിന്റെ വളര്‍ച്ചക്ക് പിന്നിലെ കരുത്ത് കോണ്‍സ്റ്റന്റൈന്‍ തന്നെയായിരുന്നു. അനിരുദ്ധ് ഥാപ, ഉദാന്ത സിങ്, ആശിഖ് കുരുണിയന്‍, സുഭാശിഷ് ബോസ് പോലുള്ള ഒരുപാട് യുവതാരങ്ങളെ ഇന്ത്യന്‍ ടീമിന് സമ്മാനിക്കാന്‍ കോണ്‍സ്റ്റന്റൈന് കഴിഞ്ഞു. ഏഷ്യന്‍ കപ്പ് യോഗ്യതയും തായ്‌ലന്‍ഡിനെതിരേയുള്ള തകര്‍പ്പന്‍ വിജയവും കോണ്‍സ്റ്റന്റൈന് കീഴില്‍ ഇന്ത്യ നേടിയ നേട്ടങ്ങളാണ്.
നാല് വര്‍ഷമായി ഇന്ത്യയില്‍ തുടരുന്നു. ഏഷ്യന്‍ കപ്പ് യോഗ്യതയായിരുന്നു പ്രധാന ലക്ഷ്യമെന്നും അത് ഞങ്ങള്‍ നേടിയെടുത്തുവെന്നും കോണ്‍സ്റ്റന്റൈന്‍ പറഞ്ഞു. കളിക്കാരുടെ പ്രകടനത്തില്‍ ഞാന്‍ അഭിമാനം കൊള്ളുന്നുണ്ടെന്നും തന്നെ പിന്തുണച്ച ഇന്ത്യന്‍ ഫുട്‌ബോള്‍ ഫെഡറേഷന് പ്രത്യേകം നന്ദിയുണ്ടെന്നും കോണ്‍സ്റ്റന്റൈന്‍ അറിയിച്ചു.
എട്ട് വര്‍ഷത്തിന് ശേഷമാണ് കോണ്‍സ്റ്റന്റൈന് കീഴില്‍ ഇന്ത്യ ഏഷ്യന്‍ കപ്പിന് യോഗ്യത നേടിയത്.