നാദാപുരം: തൂണേരി മുടവന്തേരിയില്‍ വീട് നിര്‍മാണത്തിനിടെ സ്റ്റീല്‍ ബോംബുകള്‍ കണ്ടെടുത്തു. ഇന്നലെ രാവിലെ പുതുതായി നിര്‍മിക്കുന്ന വീടിനുള്ള മണ്ണ് നീക്കുന്ന ജോലിക്കിടെ മുടവന്തേരി ശ്രീകൃഷ്ണ ഭജന മഠത്തിനു സമീപത്തെ പുതുശേരി ജാനുവിന്റെ പറമ്പില്‍ നിന്നാണ് ജോലിക്കാര്‍ 14 സ്റ്റീല്‍ ബോംബുകള്‍ കണ്ടെടുത്തത്.
ബോംബുകളെല്ലാം പഴക്കമുള്ളവയായിരുന്നു. നാദാപുരം എസ്.ഐ അഭിലാഷിന്റെ നേതൃത്വത്തില്‍ സ്ഥലത്തെത്തിയ പൊലിസും ബോംബ് സ്‌ക്വാഡും ചേര്‍ന്ന് ഇവ കസ്റ്റഡിയിലെടുത്തു.
ചേലക്കാട്ടെ ക്വാറിയില്‍വച്ച് ബോംബുകള്‍ നിര്‍വീര്യമാക്കി. മുന്‍ കാലങ്ങളിലെ രാഷ്ട്രീയ അക്രമങ്ങള്‍ അരങ്ങേറിയ മുടവന്തേരിയില്‍ എതിരാളികള്‍ക്കെതിരെ പ്രയോഗിക്കാന്‍ സൂക്ഷിച്ചവയില്‍ പെട്ടവയായിരിക്കും ബോംബെന്നാണ് പൊലിസിന്റെ നിഗമനം.