മുത്തങ്ങ: കാട്ടാനയുടെ ആക്രമണത്തില്‍ വീട്ടമ്മക്ക് പരുക്കേറ്റു. മുത്തങ്ങ എടത്തറ പൂവാനികുന്നേല്‍ ഷൈലജ രാജന്‍(55)നാണ് പരുക്കേറ്റത്. ഇന്നലെ രാവിലെ ആറുമണിയോടെ വീടിന് സമീപത്ത് വച്ചാണ് ആനയുടെ ആക്രമണമുണ്ടായത്.
വീടിന് സമീപത്തെ പശുത്തൊഴുത്തിലേക്ക് പോകുന്നതിനിടെയാണ് ഷൈലജക്ക് നേരെ ആക്രമണമുണ്ടായത്. ശരീരത്തിന്റെ പിന്‍ഭാഗത്ത് പരുക്കേറ്റ ഷൈലജയെ സുല്‍ത്താന്‍ ബത്തേരിയിലെ സ്വകാര്യ ആശുപത്രിയിലും തുടര്‍ന്ന് കോഴിക്കോട് മെഡിക്കല്‍ കോളജിലും പ്രവേശിപ്പിച്ചു.
സംഭവത്തെ കുറിച്ച് ഷൈലജയുടെ ഭര്‍ത്താവ് രാജന്‍ പറയുന്നത് കറന്ന പശുവിനെ മാറ്റിക്കെട്ടി തിരിച്ചു വരുമ്പോള്‍ ആലയുടെ സമീപത്ത് നിന്നും ഷൈലജ ഓടിവരുന്നതാണ് കണ്ടത്.
തൊട്ട് പിറകെ ആനയുമുണ്ടായിരുന്നു. ഇതിനിടെ വെള്ളച്ചാലിലേക്ക് തെന്നിവീണ ഷൈലജയെ ആന തുമ്പിക്കൈ കൊണ്ട് എടുത്തെറിഞ്ഞു.
പിന്നീട് തന്റെ നേരെ ആന തിരിയുന്നതിനു മുന്‍പ് കയ്യില്‍ കിട്ടിയ വടികൊണ്ട് ആനയെ എറിയുകയായിരുന്നു. മസ്തകത്തില്‍ ഏറുകൊണ്ടതോടെ ആന സമീപത്തെ കാട്ടിലേക്ക് മറയുകയും ചെയ്തു. കൊലവിളിയുമായെത്തിയ ആനക്ക് മുന്നില്‍ നിന്ന് ജീവന്‍ തിരിച്ചുകിട്ടിയ ആശ്വാസത്തിലാണ് ഈ കുടുംബം.