കോട്ടത്തറ: കല്‍പ്പറ്റയില്‍ നിന്നും കോട്ടത്തറ വെണ്ണിയോട്ടേക്ക് സര്‍വിസ് നടത്തിയിരുന്ന കെ.എസ്.ആര്‍.ടി.സി ബസുകള്‍ ഉടന്‍ പുനരാരംഭിക്കണമെന്ന് കോട്ടത്തറ ഗവ.എച്ച്.എസ്.എസ് പൂര്‍വ വിദ്യാര്‍ഥി സംഗമം ആവശ്യപ്പെട്ടു. സര്‍വിസുകള്‍ മുന്നറിയിപ്പില്ലാതെ നിര്‍ത്തലാക്കിയത് യാത്രക്കാര്‍ക്ക് ദുരിതമായിരിക്കുകയാണ്.
റോഡ് പണി പൂര്‍ത്തിയാക്കിയ ഈ റോഡിലൂടെ വൈകിട്ടും രാത്രിയിലുമായി മൂന്ന് ട്രിപ്പുകളാണ് നിര്‍ത്തലാക്കിയിരിക്കുന്നത്. ഗ്രാമപഞ്ചായത്ത് ഓഫിസ്, വില്ലേജ് ഓഫിസ്, കൃഷിഭവന്‍, എസ്.എ.എല്‍.പി, കോട്ടത്തറ ഗവ.എച്ച്.എസ്.എസ് സ്‌കൂളുകള്‍ തുടങ്ങി നിരവധി സ്ഥാപനങ്ങളിലെ വിദ്യാര്‍ഥികളും ജീവനക്കാരും ആശ്രയിക്കുന്നത് ഈ ബസുകളെയാണ്.
നേരത്തെ പാടേ തകര്‍ന്നിരുന്ന പിണങ്ങോട് കോട്ടത്തറ റോഡ് അറ്റകുറ്റപ്പണികള്‍ നടത്തി ഗതാഗതയോഗ്യമാക്കിയിട്ടും സര്‍വിസ് പുനരാരംഭിക്കാന്‍ നടപടിയെടുക്കാത്ത അധികൃതരുടെ നിസംഗതയില്‍ യോഗം പ്രതിഷേധം രേഖപ്പെടുത്തി. കല്‍പ്പറ്റയില്‍ നിന്നും കോട്ടത്തറ വരെ സര്‍വിസ് നടത്തുന്ന സ്വകാര്യ ബസുകളുടെ പെര്‍മിറ്റ് വെണ്ണിയോട് വരെ നീട്ടണമെന്നും യോഗം ആവശ്യപ്പെട്ടു. പി.ടി.എ പ്രസിഡന്റ് കെ.കെ മമ്മൂട്ടി അധ്യക്ഷനായി. വി.എന്‍ ഉണ്ണിക്കൃഷ്ണന്‍, വി അബ്ദുല്‍ നാസര്‍, പി.കെ മൊയ്തു, ടി.ടി ജോസഫ്, പി. അസ്സു, കെ.കെ മുഹമ്മദലി സംസാരിച്ചു. ഭാരവാഹികളായി എം.കെ റസാഖ് (പ്രസി), പി.സി മൊയ്തു (വൈസ് പ്രസി), കെ.കെ നാസര്‍ (ജനറല്‍ സെക്ര), കെ.പി ഫസല്‍ (ജോ സെക്ര), എ. ഗഫൂര്‍ (ട്രഷ) എന്നിവരെ തെരഞ്ഞെടുത്തു.