താനൂര്‍: ഇന്നലെ താനൂരിലുണ്ടായ അക്രമണത്തിനിടയില്‍ 250 ഓളം വരുന്ന പ്രാവുകളെയാണ് അക്രമികള്‍ കൂടുകളോടെ കടലില്‍ താഴ്ത്തിയത്. കടല്‍തീരത്തു പ്രാവുകളെ വളര്‍ത്തുന്ന കെട്ടിയുണ്ടാക്കിയ പന്തലില്‍ നിന്നാണ് പ്രാവുകളെയെടുത്ത് കടലില്‍ താഴ്ത്തിയത്.
കൂടുകളുടെ വാതിലുകള്‍ അടച്ചതു കാരണം പ്രാവുകള്‍ കടലില്‍ ചത്തു പൊങ്ങാനും ഇടയില്ല. ഇരുപത് ആളുകള്‍ ചേര്‍ന്നു വളര്‍ത്തുന്ന പ്രാവുകളാണിത്.
പറക്കല്‍ മത്സരത്തിനു ഉപയോഗിക്കുന്നവയായതിനാല്‍ നല്ല വില വരുന്ന പ്രാവുകളാണിവ. അരിശം തീരാത്ത അക്രമികള്‍ ഓല മേഞ്ഞുണ്ടാക്കിയ പന്തലും ഒഴിഞ്ഞു കിടന്ന കൂടുകളും പെട്രോള്‍ ഒഴിച്ചു കത്തിച്ചു. വന്‍ വിലവരുന്ന നാലു മീന്‍വലകളും കൂട്ടത്തില്‍ കത്തിയമര്‍ന്നു. പോലിസില്‍ പരാതി നല്‍കിയിട്ടുണ്ട്.