തിരുവനന്തപുരം: കേരളത്തില്‍ സെന്‍സസ് പ്രവര്‍ത്തനം നിര്‍ത്തിവയ്ക്കില്ലെന്ന് മുഖ്യമന്ത്രി പിണറായി വിജയന്‍. സെന്‍സസ് സാധാരണ നടപടി മാത്രമാണെന്നും എന്‍.പി.ആറുമായി ബന്ധപ്പെട്ട ചോദ്യങ്ങള്‍ സെന്‍സസില്‍ ഉണ്ടാവില്ലെന്നും മുഖ്യമന്ത്രി പറഞ്ഞു.

ജനങ്ങള്‍ക്ക് ഇക്കാര്യത്തില്‍ ആശങ്ക വേണ്ടെന്നും മുഖ്യമന്ത്രി നിയമസഭയില്‍ പറഞ്ഞു. സെന്‍സസിലൂടെ എന്‍.പി.ആറിനു വേണ്ടി വിവരശേഖരണമെന്ന പ്രതിപക്ഷത്തിന്റെ അടിയന്തരപ്രമേയ നോട്ടീസിന് മറുപടി നല്‍കുകയായിരുന്നു മുഖ്യമന്ത്രി.

അതേസമയം, സെന്‍സസ് നടപടി നിര്‍ത്തിവയ്ക്കണമെന്ന് പ്രതിപക്ഷ നേതാവ് രമേശ് ചെന്നിത്തല സഭയ്ക്ക് ശേഷം വാര്‍ത്താസമ്മേളനത്തില്‍ പറഞ്ഞു.

കെ.എം ഷാജി എം.എല്‍.എയാണ് സെന്‍സസ് പ്രവര്‍ത്തനത്തിലെ ആശങ്ക ചൂണ്ടിക്കാട്ടി അടിയന്തര പ്രമേയം അവതരിപ്പിച്ചത്. സെന്‍സസ് ഉദ്യോഗസ്ഥരുടെയും എന്യുമറേറ്റര്‍മാരുടെയും നിയന്ത്രണം കേന്ദ്ര സര്‍ക്കാരിനാണെന്ന് നോട്ടീസ് അവതരിപ്പിച്ച കെ.എം ഷാജി ആരോപിച്ചു. ആശങ്ക ഇപ്പോഴും നിലനില്‍ക്കുന്നുണ്ട്. ജനങ്ങളെ സംസ്ഥാന സര്‍ക്കാര്‍ വിഡ്ഢികളാക്കുകയാണെന്നും മുസ്‌ലിംകളെ കെട്ടിപ്പിടിച്ചാല്‍ തീരുന്നതല്ല പ്രശ്‌നമെന്നും കെ.എം ഷാജി പറഞ്ഞു.

എന്‍.പി.ആറുമായി ബന്ധപ്പെട്ട് കേന്ദ്രം വിളിച്ച യോഗത്തില്‍ എന്തിനാണ് സംസ്ഥാന സര്‍ക്കാര്‍ പങ്കെടുത്തതെന്നും കെ.എം ഷാജി ചോദിച്ചു. യോഗത്തിലേക്ക് പശ്ചിമബംഗാള്‍ പോയില്ലെന്നും ആണിനേക്കാള്‍ ശക്തയായ പെണ്ണാണ് അവിടെ ഭരിക്കുന്നതെന്നും കെ.എം ഷാജി പറഞ്ഞു.