ദമാം: ജോലിസ്ഥലത്തെ ദുരിതങ്ങൾ മൂലം ജീവിതം വഴിമുട്ടിയ മലയാളി വനിത ഇന്ത്യൻ എംബസ്സിയുടെയും നവയുഗം സാംസ്ക്കാരിക വേദിയുടെയും സഹായത്തോടെ നിയമനടപടികൾ പൂർത്തിയാക്കി നാട്ടിലേയ്ക്ക് മടങ്ങി. രണ്ടു മാസം മുമ്പ് സഊദിയിലെത്തിയ എറണാകുളം തിരുവല്ല സ്വദേശിനി കെ.ടി.സുജയാണ് നാട്ടിലേയ്ക്ക് മടങ്ങിയത്. ട്രാവൽസ് ഏജന്റ് വഴി ദമാമിലെ സ്വദേശിയുടെ വീട്ടിലേക്ക് എത്തിയ ഇവർക്ക് സ്‌പോൺസറുടെ പ്രായമായ മാതാവിനെ പരിചരിക്കലായിരുന്നു പ്രധാന ജോലി. എന്നാൽ, ആദ്യദിവസം മുതലേ തനിയ്ക്ക് മാനസിക പീഢനവും, കഷ്ടപ്പാടുകളും അനുഭവിയ്ക്കേണ്ടി വന്നതായും പലപ്പോഴും മതിയായ ആഹാരം പോലും തടഞ്ഞുവെന്നും ഇക്കാര്യം ചോദിച്ചാൽ സ്ത്രീകൾ ദേഹോപദ്രവം വരെ ഏൽപ്പിച്ചിരുന്നു എന്നും സുജ പറഞ്ഞു.

     ഈ വിവരങ്ങൾ യുവതി നാട്ടിൽ വീട്ടുകാരെ അറിയിക്കുകയായിരുന്നു. തുടർന്ന് സുജയുടെ പിതാവ് മുഖ്യമന്ത്രിയെ നേരിട്ട് കണ്ടു ബോധിപ്പിക്കുകയും നോർക്കയിൽ പരാതി കൊടുക്കയും ചെയ്തു. സംസ്ഥാന സർക്കാരിൽ നിന്നും സഊദിയിലെ ഇന്ത്യൻ എംബസ്സിയിലേയ്ക്ക് പരാതി എത്തിയതിനെ തുടർന്ന് എംബസ്സി നവയുഗം കേന്ദ്രകമ്മിറ്റി വൈസ് പ്രസിഡന്റും ജീവകാരുണ്യപ്രവത്തകയുമായ മഞ്ജു മണിക്കുട്ടന് കേസിൽ ഇടപെടാൻ അനുമതിപത്രം നൽകി ചുമതലപ്പെടുത്തുകയായിരുന്നു. ഇവരുടെ നിർദേശപ്രകാരം യുവതി ജോലിസ്ഥലത്തു നിന്നും ഇറങ്ങി അടുത്തുള്ള പോലീസ് സ്റ്റേഷനിൽ പോയി അഭയം തേടുകയും മഞ്ജുവും, ഭർത്താവും നവയുഗം ജീവകാരുണ്യപ്രവർത്തകനുമായ പദ്മനാഭൻ മണിക്കുട്ടനും കൂടി പോലീസ് സ്റ്റേഷനിൽ എത്തി യുവതിയെ ജാമ്യത്തിലെടുത്ത് ദമാമിലെ വനിതാ അഭയകേന്ദ്രത്തിൽ എത്തിച്ചു. തുടന്ന് സാമൂഹ്യ പ്രവർത്തകർ യുവതിയുടെ സ്പോൺസറുമായി ബന്ധപ്പെട്ട് സംസാരിച്ചെങ്കിലും അയാൾ സഹകരിയ്ക്കാൻ തയ്യാറായില്ല. വിസയ്ക്കായി തനിയ്ക്ക് ചിലവായ പണം തിരികെ നൽകിയാൽ സുജയുടെ കാര്യത്തിൽ ഇടപെടാം എന്നായിരുന്നു സ്‌പോൺസറുടെ മറുപടി. തുടർന്ന് ഇന്ത്യൻ എംബസ്സി സുജയെ കൊണ്ടുവന്ന ട്രാവൽ ഏജൻസിയുമായി ബന്ധപ്പെട്ട്, സ്പോൺസർ വിസയ്ക്ക് നൽകിയ പണം തിരികെ കൊടുക്കാൻ നിർദ്ദേശിക്കുകയായിരുന്നു.

     ഒടുവിൽ വനിതാ അഭയകേന്ദ്രം വഴി സുജയ്ക്ക് എക്സിറ്റ് അടിച്ചു നൽകി. നിയമ നടപടികൾ പൂർത്തിയായതോടെ മണിക്കുട്ടന്റെ സുഹൃത്ത് നൽകിയ വിമാന ടിക്കറ്റിലാണ് യുവതി നാട്ടിലേക്ക് യാത്രയായത്. സാമൂഹ്യപ്രവർത്തകരായ നൗഷാദ് അകോലത്ത്, റഫീഖ് റാവുത്തർ എന്നിവരും വിവിധ ഘട്ടങ്ങളിൽ സഹായത്തിനായി രംഗത്തുണ്ടായിരുന്നു.