റിയാദ്: ഷമീം മുസ്തഫക്കും മുഹമ്മദ് അർഹാമിനും കണ്ണീരിൽ കുതിർന്ന യാത്രാമൊഴി. കഴിഞ്ഞ തിങ്കളാഴ്ച റിയാദിൽ നിന്നും 300 കി.മി അകലെ ഹുമയാത്തിനടുത്ത് സഞ്ചരിച്ച കാർ മറിഞ്ഞ് മരിച്ച മാഹി സ്വദേശികളായ ഷമീം മുസ്തഫ(40)യുടെയും സുഹൃത്ത് അമീന്റെ മകൻ നാല്‌ വയസ്സുകാരനായ മുഹമ്മദ് അർഹാമിന്റെയും മൃതദേഹങ്ങൾ ഇന്ന് റിയാദിലെ നസീം മഖ്ബറയിലാണ്‌ മറവ് ചെയ്തത്. അസർ നമസ്ക്കാരാനന്തരം അൽ രാജ്ഹി മസ്ജിദിൽ നടന്ന മയ്യിത്ത് നമസ്കാരത്തിലും ഖബറടക്ക ചടങ്ങിലും ബന്ധുക്കളൂം സുഹൃത്തുക്കളുമായി നിരവധി പേർ പങ്കെടുത്തു. അതിനിടെ ഇന്ന് രാവിലെ ഷമീമിന്റെയും അർഹാമിന്റെയും മയ്യിത്തുകൾ അവസാനമായി ഒരു നോക്ക് കാണാൻ ആശുപത്രിയിൽ കഴിയുന്ന ഷമീമിന്റെ ഭാര്യ അഷ്മിലക്കും അമീന്റെ ഭാര്യ ഷാനിബക്കും ബന്ധുക്കളുടെ സാന്നിധ്യത്തിൽ ശുമൈസി ആശുപത്രിയിൽ വെച്ച് അവസരമൊരുക്കി. ഇരുവരും തങ്ങളുടെ പ്രിയപ്പെട്ടവർക്ക് അന്ത്യചുംബനം നൽകുന്ന കാഴ്ച അവിടെ കൂടിയവരെ കണ്ണീരിലാഴ്ത്തി.

റിയാദിലെ മാഹിക്കാരുടെ കൂട്ടായ്മയായ ‘മൈവ’യുടെ ട്രഷററായ ഷമീം മുസ്തഫയുടെയും സുഹൃത്ത് അമീന്റെയും കുടുംബം ഉംറ തീർത്ഥാടനം കഴിഞ്ഞ് തിരിച്ചു വരുന്ന വഴിയിലാണ്‌ കഴിഞ്ഞ തിങ്കളാഴ്ച പുലർച്ചെ രണ്ട് മണിയോടടുത്ത് ഇവർ സഞ്ചരിച്ചിരുന്ന കാർ നിയന്ത്രണം വിട്ട് മറിഞ്ഞത്. അപകടത്തിൽ സാരമായി പരിക്കെറ്റ ഷമീമിന്റെ ഭാര്യ അഷ്മില, അമീന്റെ ഭാര്യ ഷാനിബ എന്നിവർ റിയാദ് ശുമൈസി ആശുപത്രിയിൽ ചികിത്സയിലാണ്‌. റിയാദ് കെ.എം.സി.സി വെൽഫെയർ വിംഗ് ചെയർമാൻ സിദ്ദീഖ് തുവ്വൂരിനൊപ്പം നിഅ്മത്ത് (പ്രവാസി സാംസ്കാരിക വേദി), ഖമർ (യൂത്ത് ഇന്ത്യ) എന്നിവരും മാഹി കൂട്ടായ്മ പ്രവർത്തകരും സുഹൃത്തുക്കളും അനന്തര നടപടികൾ പൂർത്തിയാക്കുന്നതിന്‌ രംഗത്തുണ്ടായിരുന്നു.