കൊണ്ടോട്ടി: സംസ്ഥാനത്ത് റേഷന്‍ കാര്‍ഡ് ഉടമകളില്‍ മുന്‍ഗണനാ വിഭാഗത്തിലേക്കു മാറ്റാനായി താലൂക്ക് സപ്ലൈ ഓഫീസുകളില്‍ അപേക്ഷ നല്‍കി കാത്തിരിക്കുന്നത് ഒരു ലക്ഷത്തിലേറെ പേര്‍.
സംസ്ഥാനത്തെ 81 താലൂക്ക് സപ്ലൈ ഓഫിസിലായി 1,02,686 അപേക്ഷകളാണ് മുന്‍ഗണനാ വിഭാഗത്തിലേക്കു മാറ്റാനായി കെട്ടിക്കിടക്കുന്നത്.
സംസ്ഥാനത്ത് ഇതുവരെ 86,82,960 റേഷന്‍ കാര്‍ഡുകളാണ് അനുവദിച്ചത്. ഇതില്‍ 37,29,149 റേഷന്‍ കാര്‍ഡുകള്‍ മുന്‍ഗണന കാര്‍ഡുകളും 49,53,811 മുന്‍ഗണനേതര കാര്‍ഡുകളുമാണ്. മുന്‍ഗണനേതര കാര്‍ഡുകളില്‍പെട്ടവരിലെ 1,02,686 പേരാണ് മുന്‍ഗണനാ വിഭാഗത്തിലേക്ക് മാറ്റാന്‍ അപേക്ഷ നല്‍കിയത്.
19 സപ്ലൈ ഓഫിസുകളില്‍ ഇത്തരത്തിലുള്ള രണ്ടായിരത്തിലധികം അപേക്ഷകള്‍ ലഭിച്ചു. കോഴിക്കോട് ജില്ലയിലെ വടകര, കോഴിക്കോട് സി.ആര്‍.ഒ സൗത്ത് എന്നീ സപ്ലൈ ഓഫിസുകളിലാണ് ഏറ്റവും കൂടുതലും കുറവും അപേക്ഷകളുള്ളത്.
വടകരയില്‍ ഇതിനകം 4515 അപേക്ഷകളാണ് ലഭിച്ചത്. എന്നാല്‍ കോഴിക്കോട് സി.ആര്‍.ഒ സൗത്ത് സപ്ലൈ ഓഫിസില്‍ 53 അപേക്ഷകളാണുള്ളത്. സര്‍ക്കാര്‍, പൊതുമേഖലാ ജീവനക്കാര്‍, ആദായ നികുതി അടയ്ക്കുന്നവര്‍, കാല്‍ലക്ഷത്തിനു മുകളില്‍ പ്രതിമാസ വരുമാനമുള്ളവര്‍, സ്വന്തമായി ഒരേക്കറിനു മുകളില്‍ ഭൂമിയുളളവര്‍, ആയിരം ചതുരശ്ര അടിക്കു മുകളില്‍ വീടുള്ളവര്‍, നാലു ചക്രവാഹനമുള്ളവര്‍ എന്നിവരാണ് മുന്‍ഗണനേതര ലിസ്റ്റില്‍ ഉള്‍പ്പെടുന്നത്.
എന്നാല്‍ സാധാരണക്കാരായ നിരവധി പേര്‍ മുന്‍ഗണനേതര ലിസ്റ്റില്‍ ഉള്‍പ്പെട്ടതോടെയാണ് അപേക്ഷകള്‍ വര്‍ധിക്കാന്‍ കാരണം.