കലവൂര്‍: കലവൂര്‍ സ്വദേശിനിയായ 10-ാം ക്ലാസ് വിദ്യാര്‍ഥിനിയെ പീഡിപ്പിക്കാന്‍ ശ്രമിച്ചാള്‍ പിടിയില്‍. മണ്ണഞ്ചേരി പഞ്ചായത്ത് ഒമ്പതാംവാര്‍ഡില്‍ ഉള്ളാടത്തറവീട്ടില്‍ ബിജിനെ (27)യാണ് മണ്ണഞ്ചേരി പൊലിസ് അറസ്റ്റ് ചെയ്തത്. കഴിഞ്ഞ ഞായറാഴ്ച ഉച്ചയ്ക്ക് സഹപാഠികളുമായി സൈക്കിളില്‍ ട്യൂഷനുപോകുമ്പോള്‍ കലവൂര്‍ പാലത്തിന് സമീപമായിരുന്നു സംഭവം.
കലവൂര്‍ - മണ്ണഞ്ചേരി റോഡിലൂടെ ബൈക്കിലെത്തിയ യുവാവ് പിന്നിലൂടെവന്ന് കടന്നുപിടിക്കുകയായിരുന്നെന്ന് വിദ്യാര്‍ഥിനി പോലീസിന് നല്‍കിയ മൊഴിയില്‍ പറയുന്നു. കുട്ടി ബഹളംവച്ചതിനെ തുടര്‍ന്ന് യുവാവ് ഓടിരക്ഷപ്പെട്ടു. ഏറെ വൈകാതെ വാഹന നമ്പര്‍ സഹിതം കുട്ടിയുടെ പിതാവ് പൊലിസില്‍ പരാതി നല്‍കി.
  സംഭവത്തിനുശേഷം  ഭയന്നുപോയ പെണ്‍കുട്ടി ഇടറോഡിലൂടെ വീട്ടിലെത്തുകയായിരുന്നു.  ഇതേ സ്ഥലത്തുവച്ചുതന്നെ സമാനമായ സംഭവങ്ങള്‍ നടന്നിട്ടുള്ളതായി പൊലിസിന് പരാതി ലഭിച്ചിട്ടുണ്ട്.    
പിതാവിന്റെ പരാതി ലഭിച്ചതോടെ വാഹനമ്പര്‍ കേന്ദ്രീകരിച്ച് നടത്തിയ അന്വേഷണത്തില്‍ ഇന്നലെ രാവിലെ 11ഓടെ  ഇയാളെ കലവൂര്‍ പാലത്തിന് സമീപംവച്ച് അറസ്റ്റു ചെയ്യുകയായിരുന്നെന്ന് മണ്ണഞ്ചേരി എസ്.ഐ കെ. രാജന്‍ ബാബു പറഞ്ഞു. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.