മട്ടാഞ്ചേരി: അപകടത്തെ തുടര്‍ന്ന് താലൂക്ക് ആശുപത്രിയില്‍ ചികിത്സ തേടിയ കുടുംബത്തോട് നിങ്ങള്‍ പാകിസ്താനിലേക്കു പോകേണ്ടവരാണെന്ന് ഡോക്ടര്‍ പറഞ്ഞതായി പരാതി.

അരൂക്കുറ്റി വടുതല ജെട്ടിക്കു സമീപം താമസിക്കുന്ന കെ.എ നവാസാണ് ഇക്കാര്യം ചൂണ്ടിക്കാട്ടി ആശുപത്രി സൂപ്രണ്ടിനു പരാതി നല്‍കിയത്. കഴിഞ്ഞ തിങ്കളാഴ്ച രാത്രി എട്ടോടെയാണ് സംഭവം. ഇടക്കൊച്ചി കണ്ണങ്ങാട്ട് പാലത്തിനു സമീപം നവാസും കുടുംബവും അപകടത്തില്‍പെടുകയും ഓടിക്കൂടിയ നാട്ടുകാര്‍ ഇവരെ താലൂക്ക് ആശുപത്രിയായ മട്ടാഞ്ചേരി കരുവേലിപ്പടി മഹാരാജാസ് ആശുപത്രിയില്‍ എത്തിക്കുകയായിരുന്നു.

എന്നാല്‍ ഈ സമയത്ത് ഡ്യൂട്ടിയിലുണ്ടായിരുന്ന ഡോക്ടര്‍ രേഖ സമയം കഴിഞ്ഞ് പോകാനുള്ള തിരക്കിലായിരുന്നുവെന്ന് നവാസ് പറയുന്നു. മകന്റെ പേരു ചോദിക്കുകയും മകന്‍ മുഹമ്മദ് മിസ്ബാഹിന്റെ പേരു പറഞ്ഞതോടെ ഈ പേര് നിങ്ങളുടെ നാട്ടിലാണ് ഇടേണ്ടതെന്നു പറയുകയും ചെയ്തതായി നവാസ് പറഞ്ഞു. തങ്ങളുടെ നാട് ഏതാണെന്ന് നവാസിന്റ ഭാര്യ ചോദിച്ചതോടെ പാകിസ്താനാണെന്നും നിങ്ങള്‍ പാകിസ്താനിലേക്കു തന്നെ പോകേണ്ടവരാണല്ലോ എന്നും ഡോക്ടര്‍ പറഞ്ഞതായി പരാതിയില്‍ പറയുന്നു. പരാതി ലഭിച്ചുവെന്നും ജില്ലാ മെഡിക്കല്‍ ഓഫിസര്‍ക്കു കൈമാറുമെന്നും ആശുപത്രി സൂപ്രണ്ട് ഡോ. മിനു മാത്യു പറഞ്ഞു.