ന്യൂഡല്‍ഹി: പ്രധാനമന്ത്രി നരേന്ദ്രമോദി രാജ്യസഭയില്‍ നടത്തിയ പ്രസംഗത്തിലെ വാക്ക് സഭാരേഖകളില്‍ നിന്ന് നീക്കി. ഝൂട്ട്(നുണ) എന്ന വാക്കാണ് ഒഴിവാക്കിയത്. ദേശീയ ജനസംഖ്യാ രജിസ്റ്റര്‍ സംബന്ധിച്ച പരാമശത്തിനിടെയാണ് വിവാദ പ്രയോഗമുണ്ടായത്. പ്രധാനമന്ത്രിയുടെ പ്രസംഗത്തിലെ പരാമര്‍ശം ഇത്തരത്തില്‍ രാജ്യസഭാ രേഖകളില്‍ നിന്ന് നീക്കം ചെയ്യുന്നത് അപൂര്‍വ നടപടിയാണ്.

വ്യാഴാഴ്ച പ്രതിപക്ഷത്തെ വിമര്‍ശിക്കുന്നതിനിടെയായിരുന്നു പ്രധാനമന്ത്രിയുടെ പരാമര്‍ശം. ഈ വാക്ക് നീക്കം ചെയ്യണമെന്ന് പ്രതിപക്ഷം ആവശ്യമുയര്‍ന്നിരുന്നു. ഈ ആവശ്യം സ്വീകരിച്ചാണ് രാജ്യസഭാ ചെയര്‍മാന്‍ വെങ്കയ്യാ നായിഡു നടപടി സ്വീകരിച്ചത്. അതേസമയം പ്രധാനമന്ത്രിക്ക് മറുപടി നല്‍കിയ കോണ്‍ഗ്രസ് നേതാവ് ഗുലാംനബി ആസാദിന്റെ പ്രസംഗത്തിലെ ഒരു വാക്കും ഇതേ രീതിയില്‍ നീക്കം ചെയ്തിട്ടുണ്ട്.